ཆེས་མཐོའི་ཁྲིམས་ཞིབ་པ་ཞིག་བགྲེས་ཡོལ།
ཉེ་ཆར་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ངག་དབང་ཐུབ་བསྟན་བགྲེས་ཡོལ་དུ་ཕེབས་ཡོད་པ་དང་། ཁོང་གི་ལས་ཚབ་ཏུ་ཁྲིམས་ཞིབ་པ་ཞིག་ཆེས་མཐོའི་ཁྲིམས་ཞིབ་པ་ཆེ་བ་དང༌། སྤྱི་འཐུས་ཚོགས་གཙོ་ཚོགས་གཞོན། བཀའ་བློན་ཁྲི་པ་བཅས་ནས་ཚོགས་ཆུང་ཆེད་འཛུགས་ཀྱིས། འདི་ལོའི་ཕྱི་ཟླ་༩ ནང་གི་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་༦ པར་ཁྲིམས་ཞིབ་པའི་འོས་གཞི་འབུལ་རྒྱུ་ཡིན་འདུག
དེ་ཡང་ཕྱི་ཟླ་༦ ཚེས་༣༠ ཉིན་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ངག་དབང་ཐུབ་བསྟན་ དགུང་ལོའི་གནས་བབ་ཀྱིས་ཁྲིམས་ཞིབ་པའི་ལས་གནས་ནས་བགྲེས་ཡོལ་དུ་ཕེབས་པ་ལྟར། ཟླ་འདིའི་ཕྱི་ཚེས་༢ ཉིན་གྱི་དགོང་དྲོར་མེག་ལོར་བོད་ཀྱི་གསོལ་མགྲོན་ཁང་དུ་ཆེས་མཐོའི་ཁྲིམས་ཞིབ་ཁང་གིས་ཁོང་ལ་གསོལ་སྟོན་ཞིག་གོ་སྒྲིག་ཞུས་ཡོད་པ་དང་། གསོལ་སྟོན་ཐོག་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ། སྤྱི་འཐུས་ཚོགས་གཙོ་ཚོགས་གཞོན། སྲིད་སྐྱོང་། ནང་སྲིད་དང་དཔལ་འབྱོར་བཀའ་བློན། འདེམས་ལྷན་ཚོགས་གཙོ། ཁྲིམས་ཞིབ་ཁང་གི་ལས་བྱེད་བཅས་མཉམ་ཞུགས་གནང་ཡོད་པ་རེད།
སྐུ་ངོ་ངག་དབང་ཐུབ་བསྟན་མཆོག་ནི་ཕྱི་ལོ་༡༩༤༨ ལོར་གཉའ་ལམ་ཚོང་འདུས་སུ་འཁྲུངས་པ་དང༌། རང་ལོ་བདུན་ལ་སོན་སྐབས་གཉའ་ལམ་དགའ་ལྡན་འཕེལ་རྒྱས་གླིང་དགོན་པར་ཆོས་ཞུགས་གནང༌། ཕྱི་ལོ་༡༩༦༠ ལོར་ཕ་མ་གཉིས་དང་ལྷན་དུ་བལ་ཡུལ་བརྒྱུད་སྐྱབས་བཅོལ་དུ་ཕེབས་ཏེ་སློབ་གྲྭར་ ཞུགས། དེ་རྗེས་མ་སུ་རིར་ཨོ་ཀེན་ཌན་ཝན་ཅར་སློབ་གྲྭར་འཛུལ་ཞུགས་གནང༌སྟེ་སློབ་མཐར་ཕྱིན་རྗེས་སྦིར་བོད་ཚོགས་བཟོ་གཞིས་ལས་ཁང་དུ་ལས་དྲུང་གི་འགན་བཞེས། ཕྱི་ལོ་༡༩༦༩ ལོར་ལྡི་ལིར་གཞུང་འབྲེལ་དམིགས་བསལ་ལས་བྱེད་སློབ་སྦྱོང་ནང་འཛུལ་ཞུགས་གནང་སྟེ་དུས་ཡུན་ལོ་གཅིག་རིང་ལས་བྱེད་ཀྱི་སྦྱོང་བརྡར་གནང༌། དེ་ནས་ནང་སྲིད་དང་བདེ་སྲུང་བཅས་སུ་ལས་དྲུང་གི་ཞབས་ཞུ་བསྒྲུབས། ཕྱི་ལོ་༡༩༧༡ ལོར་ལ་དྭགས་སླེ་བསོད་ནམས་གླིང་གཞིས་ཆགས་གསར་འཛུགས་སྐབས་ས་གནས་འགོ་འཛིན་ལས་ཁུངས་ཀྱི་སྐད་དྲུང་དུ་བསྐོ་གཞག་བསྩལ་བ་ལྟར་ཕྱི་ལོ་༡༩༨༡ བར་ཞབས་ཞུ་བསྒྲུབས། ༡༩༨༡ ལོའི་ཟླ་༧ ཚེས་ ༢༠ ནས་བལ་ཡུལ་ར་སོ་རྒི་རི་དགེ་རྒྱས་གླིང་བོད་མིའི་གཞིས་ཆགས་ཀྱི་འགོ་འཛིན་གྱི་ལས་ཁུར་བཞེས། ཕྱི་ལོ་ ༡༩༨༣ ཟླ་ ༥ ཚེས་ ༢༥ ཉིན་བལ་ཡུལ་སྐུ་ཚབ་དོན་གཅོད་ཁང་གི་རྒན་དྲུང་དུ་གནས་སྤོས་བསྩལ།
ཕྱི་ལོ་༡༩༩༢ ཟླ་༨ ཚེས་༡ ཉིན་དྲུང་གཞོན་དུ་གནས་སྤར་གནང་བ་དང་། ༡༩༩༦ཟླ་ ༤ ཚེས་༢༩ ཉིན་ཟུང་དྲུང༌དུ་གནས་སྤར་དང་། བལ་ཡུལ་དོན་ཁང་གི་དྲུང་ཆེ་ལས་ཚབ་ཀྱི་ལས་ཁུར་བཞེས། ༡༩༩༦ ཟླ་ ༨ ཚེས་༡ ཉིན་བལ་ཡུལ་སྤོག་ར་བཀྲ་ཤིས་དཔལ་འཁྱིལ་བཟོ་གཞིས་ལས་ཁང་གི་འགོ་འཛིན་དུ་གནས་ སྤོ་གནང༌། ༡༩༩༧ ཟླ་༡༡ ཚེས་༢༤ ཉིན་བལ་ཡུལ་འཇོ་ཁེལ་བསམ་གྲུབ་གླིང་བཟོ་གཞིས་ཀྱི་འགན་འཛིན་དུ་བསྐོ་གཞག་གནང་། ཕྱི་ལོ་ ༢༠༠༠ ཟླ་༧ ཚེས་༤ ཉིན་དྲུང་འཕར་དུ་གནས་སྤར་དང་། ཟླ་༨ ཚེས་༡ ནས་དབུས་སྤྱི་ཁྱབ་རྩིས་ཞིབ་ལས་ཁང་དུ་གནས་སྤོས་གནང་། ཕྱི་ལོ་༢༠༠༡ ཟླ་༥ ཚེས་ ༡༡ ཉིན་སྡེ་ར་ལྡུན་བྱང་ཕྱོགས་བོད་མིའི་ས་གནས་ཁྲིམས་ཞིབ་ཁང་ཐོག་མར་ཟུར་འཛུགས་གནང་སྐབས་ས་གནས་ཁྲིམས་ཞིབ་པར་བསྐོ་གཞག་གནང་དོན་བཞིན་ལོ་ལྔའི་རིང་མཛད་ཁུར་བཞེས་ཤིང་། ཕྱི་ལོ་ ༢༠༠༦ ཟླ་༩ ཚེས་༧ ནས་སླར་ཡང་ས་གནས་ཁྲིམས་ཞིབ་པར་ཆོད་གན་ཐོག་མུ་མཐུད་ལོ་གཅིག་རིང་བསྐོ་གཞག་བསྩལ་བ་བཞིན་མཛད་ཁུར་བཞེས།
ཕྱི་ལོ་༢༠༠༩ ཟླ་༡༠ ཚེས ༡༦ ཉིན་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པའི་ལས་ཁུར་དམ་འབུལ་གྱིས་༢༠༡༣ ཟླ་༦ ཚེས་༣༠ ནས་བགྲེས་ཡོལ་དུ་ཕེབས་ཡོད་པ་རེད།
