༄། །ང་ཚོའི་གཤིས་ངན།

བདེན་གཏམ་དམར་རྗེན་བཤད་ན་ཞབས་འདྲེན་ཟེར། །
མི་སྨྲ་ཁ་ཁར་འདུག་ན་བླུན་པོ་ཟེར། །

ལེགས་ཉེས་ཅུང་ཟད་གླེངས་ན་འཇོན་མདོག་ཟེར། །
མཐུན་འབྲེལ་ལས་སུ་བརྩོན་ན་སྤྲེལ་ལད་ཟེར། །

 

སྐྱོན་ལ་མཛུབ་བཙུགས་བྱས་ན་ཕྱོགས་ཞེན་ཟེར། །

གནས་ལུགས་བདེན་པ་བརྡར་ན་སྒེར་གཅོད་ཟེར། །

ཁུ་སིམ་བསྡད་ན་སྤྱི་སེམས་མི་འདུག་ཟེར། །

སྤྱི་དོན་སྒྲུབ་ན་རང་དོན་ཆེད་རེད་ཟེར། །

 

ཆོས་ཚོགས་བཙུགས་ན་ཆོས་ཚོང་ཆེད་རེད་ཟེར། །

ཚོང་ལས་བྱས་ན་ངན་སོང་རྒྱུ་རེད་ཟེར། །

གྲྭ་བཙུན་བྱས་ན་མི་རིགས་གནོད་གི་ཟེར། །

མི་སྐྱ་བྱས་ན་བུ་ཕྲུག་གསོད་གི་ཟེར། །

 

ཆོས་པའི་བཤད་ན་ཆོས་ལས་མི་དགོས་ཟེར། །

ཁྱིམ་པའི་བཤད་ན་ཁྱིམ་གཞི་གལ་ཆེ་ཟེར། །

ཆབ་སྲིད་པ་ཚོས་ཆོས་ཀྱི་ཕུང་རབ་ཟེར། །

ཆོས་པའི་ཆབ་སྲིད་པ་ཚོས་ཕུང་རབ་ཟེར། །

 

རྒན་པ་དག་གི་གཞོན་པའི་མི་འཇོན་ཟེར། །

གཞོན་པ་དག་གི་རྒན་པའི་ཕུང་རབ་ཟེར། །

སྐྱེས་པ་དག་གི་ཕོ་མཆོག་མོ་དམན་ཟེར། །

བུ་མེད་དག་གི་ལངས་གཅིན་བཏང་འདོད་ཟེར། །

 

གསར་འབྱོར་རྙིང་འབྱོར་རྩོད་པ་ཐོག་ལས་ཚ། །

ཆོལ་ཁ་ཆོས་ལུགས་ཕྱོགས་རིས་ཆུ་རྒྱུན་འདྲ། །

མགོ་ནག་བོད་པ་ཚང་གི་གཤིས་ངན་འདིར། །

ཞིབ་ཏུ་བསམ་ན་མིག་ཆུ་ཤོར་བྱེད་དངོས། །

 

སྙིང་སྟོབས་ཅན་ཚོ་གཅིག་བཞུད་གཉིས་བཞུད་རེད། །

ཁ་ཕོར་རང་དོན་སྒྲུབ་མཁས་མི་བུ་འགའ། །

ལ་རྒྱ་ཁ་ཡིས་མཛེས་རྒྱན་སྤྲས་བཞིན་དུ། །

མལ་ས་དྲོད་མོའི་ནང་དུ་སྐྱིད་ཉལ་རྒྱོབས། །