སི་རི་ཡའི་སྲིད་འཛིན་ཨ་ཟཱ་ད་དང་རྒྱལ་ཚོགས་སྐུ་ཚབ་ཐུག་འཕྲད།
༢༠༡༢-༧-༩ རྒྱལ་ཚོགས་དང་ཨ་རབ་ལྷན་ཚོགས་ཀྱི་སྐུ་ཚབ་ཀོ་ཧྥི་ཨནྣན་ཕྱི་ཚེས་༨ ཉིན་སི་རི་ཡར་འབྱོར་ཡོད་པ་དང་། སྲིད་འཛིན་བྷ་ཤར་ཨལ་ཨ་ཟཱ་ད་ལ་ཞི་བའི་དོན་ཚན་དྲུག་གི་སི་རི་ཡའི་གནད་དོན་ལ་གྲོས་འགྲིག་ཡོང་ཐབས་ཆེད་རྒྱལ་ས་དྷ་མ་སི་ཁ་སི་རུ་ཐུག་འཕྲད་བྱེད་འཆར་ཡོད་ཀྱང་ཐུག་འཕྲད་ཀྱི་དུས་ཚོད་གཏན་འབེབས་བྱེད་ཐུབ་མེད་པ་རེད།།
ཐུག་འཕྲད་ཀྱི་གྲོས་བསྡུར་དེ་རྒྱ་ཚོགས་ཀྱི་དྲུང་ཆེ་ཟུར་པ་ཨནྣན་གྱི་དོན་ཚན་དྲུག་གི་ཞི་བའི་གྲོས་འཆར་དེས་དམར་གསོད་དང་དྲག་སྤྱོད་མཚམས་འཇོག་གི་གྲུབ་འབྲས་ཐོན་མ་སོང་ཞེས་ངོས་ལེན་བྱས་པའི་རྗེས་སུ་བྱུང་བ་ཞིག་ཡིན་པ་རེད། གཟའ་འཁོར་གཅིག་སྔོན་དུ་སི་རི་ཡའི་བར་གནས་་སྤྱི་མཐུན་གྱི་སྲིད་གཞུང་ཞིག་འཛུགས་ཆེད་སྟོབས་ཆེན་རྒྱལ་ཁབ་ཁག་གི་ཚོགས་འདུ་ཞིག་འཚོགས་པ་རེད། དེར་སྲིད་འཛིན་ཨ་ཟཱ་དས་ཨ་རི་ལ་སི་རི་ཡའི་ནང་ཆབ་སྲིད་བརྟན་ལྷིང་མེད་པར་བཟོ་མཁན་གྱི་ཇག་ཚོགས་གཏོང་གི་འདུག་ཅེས་རེས་གཟའ་ཉི་མའི་ཉིན་སྐྱོན་བརྗོད་བྱས་ཡོད་པ་རེད། སི་རི་ཡའི་ཕྱི་སྲིད་ལྷན་ཁང་གི་མགྲིན་ཚབ་པ་ཇི་ཧཱ་ད་མག་དྷི་སིས་བརྗོད་དོན་ལྟར་ན། གྲོས་མོལ་དེར་དོན་ཚན་དྲུག་ཅན་གྱི་ཞི་བའི་གྲོས་འཆར་ལ་དམིགས་སུ་གཙོ་འདོན་བྱེད་ཀྱི་ཡོད་པ་རེད། ཧྥ་རན་སིའི་གསར་ཁང་ཞིག་གིས་རེས་གཟའ་སྤེན་པ་ཉིན་ཨནྣན་ལ་བཅར་འདྲི་བྱས་པའི་ནང་། ཁོང་གིས་“ད་ལྟ་བར་གྲོས་འཆར་དེས་དྲག་སྤྱོད་ཀྱི་འཁྲུག་རྩོད་དེ་མཚམས་འཇོག་བྱེད་རྒྱུར་འབྲས་བུ་ཐོན་མེད་པ་རེད་”ཅེས་བརྗོད་ཡོད་པ་རེད། ཁོང་གིས་ཉིན་གཅིག་སྔོན་རྒྱལ་ཚོགས་བདེ་འཇགས་ལྷན་ཚོགས་སུ་སྙན་ཐོ་ཞིག་ཕུལ་བའི་ནང་། རྒྱལ་ཚོགས་ཀྱིས་སི་རི་ཡ་ཞི་འཇགས་ཡོང་ཐབས་སུ་ཆིངས་ཡིག་འཇོག་རྒྱུར་དམིགས་ཡུལ་བཟུང་ནས་གྲུབ་འབྲས་མ་བྱུང་བས། དེའི་ཚབ་ཏུ་ཆབ་སྲིད་ཀྱི་བར་འདོམ་བྱེད་རྒྱུར་འབད་བརྩོན་བྱེད་ན་བཟང་ཞེས་བསམ་འཆར་བརྗོད་ཡོད་པ་རེད། བྷི་བྷི་སིའི་གསར་འགོད་པ་ཇིམ་མུར་གྱིས་ཆབ་སྲིད་ཀྱི་ཞི་མོལ་གྱི་གྲུབ་འབྲས་མ་ཐོན་མཐར། ད་ཆ་ཆབ་སྲིད་ཀྱི་ཐབས་ལམ་ཞིག་གཞན་ཞིག་འཚོལ་རྒྱུར་འབད་ཀྱི་ཡོད་པ་རེད་ཅེས་བརྗོད་འདུག སི་རི་ཡའི་ཕྱོགས་འགལ་ཚོགས་ཁག་རྣམས་ནས་སྲིད་འཛིན་ཨ་ཟཱ་ད་དང་ཁོང་གི་ཕྱོགས་གཏོགས་ཚང་མ་བར་འདོམ་སྤྱི་མཐུན་སྲིད་གཞུང་ནང་ནས་ཕྱིར་བཏོན་དགོས་ཞེས་དགོས་འདུན་བཏོན་གྱི་ཡོད་མོད། སྲིད་འཛིན་ཨ་ཟཱ་དས་ཕྱིར་འཐེན་མ་བྱས་པར་ཨུ་ཚུགས་མཐའ་སྐྱེལ་བྱས་ནས་བསྡད་ཡོད་པ་རེད། སྲིད་འཛིན་ཨ་ཟཱ་དས་རྒྱང་བསྲེང་བརྙན་འཕྲིན་གི་བཅར་འདྲི་ཞིག་ནང་“ལས་སྣེ་འདི་ད་ལྟའི་གནས་སྟངས་ཛ་དྲག་པོ་འདི་ལྟ་བུའི་ནང་གོ་ས་བཟུང་དགོས་ན་ཁྱེད་རང་ལ་དང་པོ་རྒྱབ་བསྐྱོར་དགོས་ཀྱི་རེད་”ཅེས་རེས་གཟའ་ཉི་མའི་ཉིན་བརྗོད་ཡོད་པ་རེད། ཁོང་གིས་སི་རི་ཡའི་གནད་དོན་སྐོར་ལ་མུ་མཐུད་བརྗོད་དོན། ཞི་བའི་དོན་ཚན་དྲུག་གི་གྲོས་འཆར་ཧ་ཅང་ཡག་པོ་འདུག་མོད་ཨ་རི་ལ་སོགས་པའི་རྒྱལ་ཁབ་ཁག་ཅིག་གིས་སྟངས་འཛིན་བྱེད་ཀྱི་ཡོད་པ་རེད། དེ་ནི་རྒྱལ་ཁབ་གཞན་མང་པོས་མི་འདོད་པ་ཞིག་རེད་ཅེས་བརྗོད་ཡོད་པ་རེད། ཁོང་གིས་མུ་མཐུད་ནས་བརྗོད་དོན། གྲོས་འཆར་དེར་ཨ་རིས་ལག་སྦྲེལ་བྱས་ཡོད་པས་རྒྱལ་ཁབ་ཁ་ཤས་ཀྱི་དངུལ་སྤྲད། ཁ་ཤས་ཀྱིས་མཚོན་ཆ་སྤྲད་ནས་སི་རི་ཡར་འཇིགས་སྐུལ་བ་མང་པོ་གཏོང་གི་ཡོད་པས་གྲོས་འཆར་དེར་འགོག་སྐྱོན་ཡོང་བཞིན་ཡོད་ཅེས་འཇེར་མི་ནིའི་གསར་ཁང་ཞིག་ལ་བརྗོད་ཡོད་པ་རེད། སྲིད་འཛིན་ཨ་ཟཱ་དས་ཨ་རིའི་རྒྱལ་དོན་དྲུང་ཆེའམ་རྒྱལ་ཁབ་ཀྱི་མགོ་ཁྲིད་སུ་ཡང་རུང་། སི་རི་ཡའི་གནད་དོན་ཐད་དྲང་བདེན་དང་བསམ་པ་རྣམ་དག་གིས་གྲོས་བསྡུར་བྱེད་འདོད་ལ་ནམ་ཡང་ཕེབས་བསུ་ཡོད་སྐོར་བརྗོད་ཡོད་པ་རེད། “ང་ཚོས་སྒོ་ཕྱེས་ནས་བཞག་ཡོད། སྒོ་རྒྱབ་མཁན་ཁོ་ཚོ་རེད་”ཅེས་བརྗོད་ཡོད་པ་རེད། སི་རི་ཡའི་ནང་སོ་དྷི་ཨ་རབ་བྷི་ཡ་དང་ཁོ་ཊར་གཉིས་ཀྱི་འཇིགས་སྐུལ་བ་ཚོར་མཚོན་ཆས་རོགས་བསྐྱོར་དང་། ཊར་ཀིས་བསམ་བློ་དང་ཐབས་ཇུས་བཏོན་ནས་རོགས་བསྐྱོར་བྱེད་ཀྱི་ཡོད་པ་རེད་ཅེས་ཨ་ཟཱ་དས་མུ་མཐུད་བརྗོད་ཡོད་པ་དང་། སི་རི་ཡའི་མི་མང་བརྒྱ་ཆ་མང་བ་ཡིས་ཨ་ཟཱ་ད་ལ་རྒྱབ་སྐྱོར་ཡོད་སྐོར་ཡང་བརྗོད་ཡོད་འདུག ཡང་ཕྱོགས་འགལ་ཆབ་སྲིད་ཚོགས་པ་འགས་སི་རི་ཡའི་རྒྱལ་ཁབ་ཀྱི་བདེ་འཇགས་ཆེད་ཨ་ཟཱ་དའི་གཞུང་ལ་རྒྱལ་སྤྱིའི་དམག་སྡེས་ཐེ་ཇུས་བྱེད་དགོས་པའི་འབོད་སྐུལ་རིམ་པར་ཞུས་ཡོད་པ་རེད། ད་ཐེངས་རེས་གཟའ་ཉི་མ་གཅིག་པུར་ཟིང་འཁྲུག་ཁྲོད་མི་མང་༦༠ ལྷག་རྐྱེན་ལམ་དུ་བཏང་ཡོད་སྐོར་ས་གནས་འབྲེལ་མཐུད་ཚོགས་ཆུང་ཞེས་པའི་སི་རི་ཡའི་ལས་འགུལ་བའི་དྲ་བས་བརྗོད་ཡོད་པ་རེད། སི་རི་ཡའི་ནང་ཟིང་འཁྲུག་ལངས་ནས་་འདས་པའི་ཟླ་བ་༡༦ ནང་མི་མང་༡༦༧༠༠ ལྷག་རྐྱེན་ལམ་དུ་ཕྱིན་ཡོད་སྐོར་ཕྱོགས་འགལ་ཆབ་སྲིད་ཚོགས་པ་ཁག་གིས་འགྲེལ་བརྗོད་བྱེད་ཀྱི་ཡོད་པ་རེད།
