མདོ་སྨད་ཨ་མཆོག་ཏུ་རང་ལུས་མེར་སྲེག་གི་ངོ་རྒོལ།
ཟླ་འདིའི་ཚེས་༡༣ ཉིན་བོད་མདོ་སྨད་ཨ་མཆོག་ཀླུ་ཤོད་སྐྱི་ནང་ས་གནས་བོད་མི་ཞིག་གིས། རང་ལུས་མེར་སྲེག་གིས་རྒྱ་གཞུང་ལ་ངོ་རྒོལ་བྱས་ཏེ་སྐུ་གྲོངས་འདུག
དེ་ཡང་ཕྱི་ཚེས་ ༡༣ སྟེ། བོད་ཀྱི་ལོ་སར་ཚེས་བ་༣ ཉིན་གྱི་ཉིན་གུང་ཆུ་ཚོད་ ༡།༡༠ ཡས་མས་སུ། བོད་མདོ་སྨད་ཀན་ལྷོ་ཁུལ་གཙོད་གྲོང་ཁྱེར་གྱི་ཁོངས་གཏོགས་ཨ་མཆོག་སྨད་ཀྱི་ཀླུ་ཤོད་སྐྱི་ནང་ཞེས་པའི་ས་གནས་ཀྱི་རང་ལོ་ ༢༦ ཡིན་པའི་འབྲུག་པ་མཁར་གྱིས། རང་ལུས་མེར་སྲེག་ཀྱིས་རྒྱ་གཞུང་གི་དྲག་གནོན་དབང་བསྒྱུར་སྲིད་ཇུས་ལ་ངོ་རྒོལ་གནང་སྟེ་སྐུ་གྲོངས་ཡོད་འདུག
རྒྱལ་གཅེས་དཔའ་བོ་འབྲུག་པ་མཁར་ལགས་ཀྱི་ཕ་མིང་ལ་རྟ་མགྲིན་ཚེ་རིང་དང་མ་མིང་ལ་རྟ་མགྲིན་མཚོ་ཞུ་ཡི་ཡོད་འདུག་ལ། ད་ཆར་ཁོང་དང་བཟའ་ཟླ་གཉིས་ལ་བྱིས་པ་གསུམ་ཡོད་པ་ལས་ཆེ་བ་ལོ་ ༦ དང་། འབྲིང་བ་ལོ་ ༤ ། ཆུང་བ་ལོ་ ༡ བཅས་ཡིན་འདུག །
