རིན་ཆེན་རིལ་བུ་རྫུན་མ་བཟོ་མཁན་ཡོད་སྐོར་གསུངས་སོང་།
ཟླ་འདིའི་ཚེས་༢༣ ཉིན་སྨན་རྩིས་ཁང་དབུ་བརྙེས་ནས་ལོ་༥༢ འཁོར་བའི་དུས་དྲན་མཛད་སྒོ་ཞིག་དྷ་ས་སྨན་རྩིས་ཁང་དུ་འཚོགས་ཡོད་པ་དང་། སྐབས་དེར་སྨན་རྩིས་ཁང་འགན་འཛིན་གྱིས་རྒྱ་གར་གཞུང་གིས་གསོ་བ་རིག་པ་ཁྲིམས་ཐོག་ནས་ངོས་ལེན་བྱས་ཡོད་ཀྱང་། བོད་སྨན་དེའི་ནང་ཚུད་ཀྱི་མེད་སྐོར་ངོ་སྤྲོད་གནང་སོང་།
ལོ་འཁོར་མཛད་སྒོའི་ཐོག་རྒྱ་གར་གྱི་སྲོལ་རྒྱུན་གསོ་རིག་གི་སློབ་སྟོན་པ་ཟུར་པ་སཱ་རིན་ཌིར་ ཤཱར་མ་དང་། བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་ཁྲིམས་ཞིབ་པ་རྣམ་པ་དང་། ལྷན་ཁང་ཁག་གི་དྲུང་ཆེ་ཁག་ཅིག གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་སོགས་ཕེབས་ཡོད་པ་རེད།
སྨན་རྩིས་ཁང་གི་འགན་འཛིན་ཚེ་རིང་བཀྲ་ཤིས་དང་། སྐུ་མགྲོན་གཙོ་བོ་གཉིས་ཀྱིས་མཛད་སྒོ་དང་འབྲེལ་བའི་གསུང་བཤད་གནང་བ་དང་། སྨན་རྩིས་ཁང་ནས་པར་སྐྲུན་བྱས་པའི་དཔེ་དེབ་<<རྩ་ཆུ་ཊཱིཀ་ཕྱོགས་བསྡུས་>>ཞེས་པའི་དེབ་དབུ་འབྱེད་གནང་ཡོད་པ་རེད།
སྨན་རྩིས་ཁང་གི་འགན་འཛིན་ཚེ་རིང་བཀྲ་ཤིས་ཀྱིས་རྒྱ་གར་གཞུང་གིས་བོད་སྨན་ཁྲིམས་ཐོག་ནས་ངོས་ལེན་མེད་སྐོར་གསར་འགོད་པའི་དྲི་བར་ལན་འདེབས་གནང་དོན། “ཉེ་ཆར་གསོ་བ་རིག་པ་ཞེས་རྒྱ་གར་གྱི་སྔ་མོའི་སྨན་ཞེས་ཁྲིམས་ཞིག་བཟོས་ཡོད་པ་དང་། དེས་ལ་དྭགས་དང་། འབྲས་ལྗོངས་དེ་ཚོའི་ནང་རྒྱ་གར་གྱི་མི་སེལ་ཡིན་པ་བོད་སྨན་སློབ་སྦྱོང་ཐོན་མཁན་ཚོར་ཕན་ཐོགས་ཡོད་པ་རེད། འོན་ཀྱང་སྨན་རྩིས་ཁང་སྔར་བཞིན་བོད་སྨན་ཞེས་ལོགས་སུ་ཡོད་པ་ལྟ་བུ་རེད་”ཅེས་རྒྱ་གར་གཞུང་གིས་གསོ་བ་རིག་པའི་ཞེས་པའི་ནང་བོད་སྨན་ཚུད་ཀྱི་མེད་པ་དང་། བོད་ཀྱི་གསོ་བ་རིག་པ་ཞེས་རྒྱ་གར་གཞུང་གིས་ངོས་ལེན་བྱེད་ཀྱི་མེད་པའི་དཀའ་ངལ་ཡོད་སྐོར་དང་། རྒྱ་གར་ཧི་མ་ལ་ཡའི་རི་རྒྱུད་ཀྱི་བོད་སྨན་སྦྱོང་མཁན་ཚོར་བོད་ཀྱི་སྨན་རྩིས་ཁང་གིས་སློབ་སྦྱོང་སྤྲད་པ་དང་། དགེ་རྒན་བཏང་བ་སོགས་རོགས་པ་ཚང་མ་བྱས་ཡོད་སྐོར་དང་། ཁོང་ཚོ་རེ་བ་བཅོལ་དུ་སྨན་རྩིས་ཁང་ལ་ཡོང་བ་དང་། དེ་རྗེས་ཁོང་ཚོའི་ངོས་ནས་རྒྱ་གར་གཞུང་ལ་འབྲེལ་བ་བྱེད་པ་དང་། ཕྱི་ལ་འབྲེལ་བ་བྱེད་སྐབས་གསོ་བ་རིག་པ་དེ་བོད་སྨན་མིན་པ་འདྲ་བཤད་ཀྱི་ཡོད་སྐོར་ངོ་སྤྲོད་གནང་སོང་།
སྨན་རྩིས་ཁང་གི་ལས་དོན་གྱི་གྲུབ་འབྲས་སྐོར་གསུངས་དོན། “སློབ་གྲྭ་བཙུགས་ནས་སྨན་པ་མང་པོ་བྱུང་ཡོད་པ་དང་། སྨན་སྦྱོར་དེ་ལྷ་ས་སྨན་རྩིས་ཁང་ནང་བཞིན་སྨན་སྦྱོར་༡༧༣ ཡག་པོ་བྱུང་བ་རྒྱ་གར་གྱིས་ངོས་ལེན་ཡོད་པ་རེད། སྨན་ཁང་༥༢ ཡོད་པ་དང་། སྨན་རྩ་ཉམས་ཞིབ་བྱས་ཏེ་ཧི་མ་ལ་ཡའི་རི་རྒྱུད་དུ་སྨན་རྩྭ་མང་པོ་ཡོད་པ་རེད། དེ་ཚོ་རྒྱ་ནང་གི་གསོ་རིག་སྨན་པ་དེ་ཚོས་ངོ་ཤེས་ཀྱི་ཡོད་པ་རེད། དེ་ཚོས་ཐོག་ཉམས་ཞིབ་ཡག་པོ་བྱུང་ཡོད་པ་རེད། ཐོག་མར་སྨན་རྩིས་ཁང་བཙུགས་དུས་ནས་སྨན་སྦྱིན་དེ་ཤུགས་ཆེན་པོ་རེད་ལ། བོད་གཞུང་ལ་དངུལ་ཕུལ་མཁན་ཤུགས་ཆེ་ཤོས་ཤིག་སྨན་རྩིས་ཁང་རེད་”ཅེས་དང་། ཕྱི་རྒྱལ་དང་། རྒྱ་གར་ནང་གི་ས་གནས་ཁག་ཅིག་ཏུ་སྨན་ཁང་གསར་འཛུགས་བྱེད་ཀྱི་ཡིན་སྐོར་དང་། ཨ་རིར་སྨན་ཁང་འཛུགས་རྒྱུར་དཀའ་ངལ་ཡོད་ནའང་། སྨན་པ་ཨ་རིར་གཏོང་རྒྱུ་དང་། སྨན་ཁག་ཅིག་ཨ་རིའི་འཕྲོད་བསྟེན་ལས་ཁུངས་སུ་བཏང་ཡོད་སྐོར་དང་། ཨ་རིའི་ཁྲིམས་ཐོག་ནས་ཡག་པོ་ཆགས་རྒྱུར་རེ་བ་བྱེད་ཀྱི་ཡོད་སྐོར་གསུངས་སོང་།
ཁོང་གིས་རིན་ཆེན་རིལ་བུ་རྫུན་མ་ཡོད་སྐོར་གསུངས་དོན། “སྨན་རྩིས་ཁང་ནས་བཟོ་སྟངས་བཞིན་བཟོས་པའི་རིན་ཆེན་རིལ་བུ་རྫུན་མ་ཡོད་པར་དོགས་པ་ཆེན་པོ་ཡོང་གི་འདུག རིན་ཆེན་རིལ་བུ་ང་ཚོས་བཟོས་པ་ལས་མང་བ་བལ་ཡུལ་དང་། ལྷ་ས། ཧོང་ཀོང་། མེག་སི་ཀོ་དེ་ཚོའི་ནང་ཡོང་གི་ཡོད་པ་ལྟ་བུ་འདུག ང་ཚོར་རིན་ཆེན་རིལ་བུ་དཀོན་པོ་རེད། མང་ཆེ་བ་ནད་པར་སྤྲོད་རྒྱུ་དང་། ཕྲན་བུ་བཙོང་རྒྱུ་ཡོད་པ་རེད། རིལ་བུ་ག་ཚོད་བཟོས་པ་ལྟ་ཆོག་ཆོག་རེད། དེ་བཞིན་ཕྱི་རྒྱལ་དུ་ཕྱི་བསྐྱོད་ཐོངས་མཆན་རག་ཆེད་དུ་སྨན་རྩིས་ཁང་གི་སྨན་པ་ཡིན་ཞེས་རྫུན་བཤད་མཁན་བྱུང་བ་རེད། ཉེ་ཆར་མི་ཞིག་གིས་སྨན་རྩིས་ཁང་གི་སྨན་པ་ཡིན། ཁེ་ཎ་ཌར་ཚོགས་འདུ་ལ་འགྲོ་དགོས་ཞེས་གཞུང་ཚབ་ལ་བཤད་འདུག དེའི་སྐབས་གཞུང་ཚབ་ཀྱིས་སྨན་རྩིས་ཁང་གི་དྲ་རྒྱ་ལ་བལྟས་འདུག་ལ། དེ་བཞིན་ང་ཚོར་སྐད་ཆ་དྲིས་སོང་། དེའི་སྐབས་ང་ཚོས་གཞུང་ཚབ་ལ་མི་སུ་ཡིན་སྐད་ཆ་དྲིས་ཀྱང་། དེ་གསང་བ་རེད་ངོ་སྤྲོད་བྱེད་ཀྱི་མི་འདུག”ཅེས་འགྲེལ་བརྗོད་གནང་སོང་།
