པེན་རྒྱལ་སྤྱིའི་ཚོགས་འདུའི་ཐོག་བོད་མི་མཉམ་ཞུགས།
ཕྱི་ཟླ་༥ ཚེས་༡༤ ནས་ཉིན་བཞིའི་རིང་པོ་ལན་གྱི་པེན་རྩོམ་པ་པོའི་མཐུན་ཚོགས་དང་། ཁིར་ཁོ་གྲོང་ཁྱེར་གྱི་དུས་སྟོན་ལས་ཁུངས་གཉིས་ཀྱིས་གོ་སྒྲིག་འོག རྒྱལ་སྤྱིའི་པེན་རྩོམ་པ་པོའི་མཐུན་ཚོགས་ཀྱི་བཙོན་འོག་རྩོམ་པ་པོའི་ལྷན་ཚོགས་ཀྱི་ཚོགས་ཆེན་ཐེངས་བཅུ་པ་དེ་པོ་ལན་ཌིའི་གྲོང་ཁྱེར་ཁིར་ཁོ་(Krakow)རུ་འཚོགས་ཡོད་ཅིང། པེན་ཕྱི་སྡོད་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཞོན་སྤྲོ་ཚིགས་ཆོས་གྲགས་ཚོགས་འདུར་མཉམ་ཞུགས་དང་གཏམ་བཤད་གནང་ཡོད་པ་རེད།
ཐེངས་འདིའི་ཚོགས་འདུར་རྒྱལ་སྤྱིའི་པེན་རྩོམ་པ་པོའི་མཐུན་ཚོགས་ཀྱི་རྒྱུན་ལས་རྣམས་དང་། དེ་བཞིན་ཨ་རི་དང་། དབྱིན་ཇི། ཧྥ་རན་སི། སུད་སི། ཁ་ན་ཌ། བྷེལ་རྗམ། ཕྱི་སྡོད་རྒྱ་རིགས་སོགས་ཀྱི་པེན་རྩོམ་པ་པོའི་མཐུན་ཚོགས་ཀྱི་ཡན་ལག་ཁག་ཉེར་བརྒྱད་ཀྱི་སྐུ་ཚབ་བརྒྱ་ཙམ་མཉམ་ཞུགས་བྱས་ཡོད་ཅིང། ཚོགས་འདུ་ཉིན་བཞིའི་རིང་རྩོམ་འབྲིའི་རང་དབང་དང་། བཙོན་འོག་ཚུད་པའི་རྩོམ་པ་པོའི་གནས་ཚུལ་དང་ཉམས་མྱོང་། དེང་རབས་ཀྱི་བརྡ་འཕྲིན་བརྒྱུད་ལམ་ཁག་བེད་སྤྱོད་གཏོང་ཚུལ། མཉམ་འབྲེལ་རྒྱལ་ཚོགས་བརྒྱུད་འགྲོ་བ་མིའི་ཐོབ་ཐང་སྲུང་སྐྱོབ་བྱ་ཚུལ། རྩོམ་རིག་གི་ཕན་ཡོན་དང་ནུས་ཤུགས་བཅས་ཀྱི་སྐོར་ལ་ཚོགས་ཆུང་ཆེད་བགོས་ཀྱིས་གོ་བསྡུར་བགྲོ་གླེང་དང། རྒྱལ་སྤྱིའི་པེན་གྱི་དེ་སྔའི་ལས་འགུལ་ཁག་ལ་བསྐྱར་ཞིབ་དང་། སླད་མར་ནུས་ཤུགས་ལྡན་པའི་ལས་འགུལ་སྤེལ་ཐབས་སྐོར་ལ་གླེང་སློང་བྱས་ཡོད་པ་རེད། ཚོགས་འདུའི་སྐབས་ཁིར་ཁོ་གྲོང་ཁྱེར་སྤྱི་ཁྱབ་པ་སྐུ་ཞབས་ཇེཀི་མ་ཆི་རོསིཀེ(Jacek Majchrowski) དང་། པོ་ལན་ཌིའི་ཕྱི་སྲིད་བློན་ཆེན་ཟུར་པ་སྙན་གྲགས་ཆེ་བའི་མཁས་དབང་ཝེ་ལ་ཌེསི་ལོ་བྷར་ཁྲོསི་ཟུསིཀེ (Waldayslaw Bartoszevski)སོགས་ཀྱིས་གཏམ་བཤད་གནང་ཡོད་པ་རེད།
ཚོགས་འདུ་འདིའི་ཐོག་རྒྱ་ནག་ནང་གི་རྩོམ་པ་པོའི་སྐོར་གྱི་སྙན་ཐོ་ཞིག་ཁྱབ་བསྒྲགས་བྱས་ཡོད་པ་དང། སྙན་ཐོ་དེའི་ནང་ཉིས་སྟོང་བརྒྱད་ནས་ད་བར་གྱི་བོད་ནང་གི་འགྲོ་བ་མིའི་ཐོབ་ཐང་སོགས་ཀྱི་གནས་ཚུལ་དང། རྒྱའི་བཙོན་འོག་ཏུ་ཚུད་པའི་བོད་རིགས་རྩོོམ་པ་པོ་བརྒྱད་ཀྱི་གནས་ཚུལ་བཀོད་ཡོད་པ་རེད།
ཚོགས་འདུའི་ཐོག་པེན་ཕྱི་སྡོད་བོད་ཀྱི་རྩོམ་པ་པོའི་མཐུན་ཚོགས་ཀྱིས་ཚོགས་གཞོན་སྤྲོ་ཚིགས་ཆོས་གྲགས་ཀྱིས་བོད་ནང་གི་རང་ལུས་མེར་སྲེག་སྐོར་དང། བཙོན་འོག་ཏུ་ཚུད་པའི་བོད་མི་རྩོམ་པ་པོ་དང་། གཞས་པ། སྒྱུ་རྩལ་པ་སོགས་མི་སྣ་བཞི་བཅུ་ལྷག་གི་གནས་ཚུལ་ངོ་སྤྲོད་གཏམ་བཤད་དང་དྲི་བ་དྲིས་ལན་བྱས་ཤིང་། བོད་མིའི་སྨྲ་བརྗོད་རང་དབང་ལ་བརྩི་འཇོག་ཡོང་བ་དང། བཙོན་འོག་དུ་ཚུད་པའི་བོད་རིགས་རྩོམ་པ་པོ་དང་སྒྱུ་རྩལ་པ་རྣམས་བཙོན་གྲོལ་དང་དེ་དག་གི་བདེ་འཇགས་སྐོར་ལ་གྲོས་གཞི་ཁག་གསུམ་བཏོན་ཡོད་ཅིང། གྲོས་གཞི་དེ་དག་འདི་ལོའི་ཕྱི་ཟླ་༩ བའི་ཨེསི་ལན་ཌིའི་རྒྱལ་ཁབ་ནང་འཚོགས་འཆར་གྱི་རྒྱལ་སྤྱིའི་པེན་གྱི་ཚོགས་ཆེན་སྐབས་སུ་གླེང་སློང་བྱ་རྒྱུའི་གྲོས་འཆམ་བྱུང་ཡོད་པ་རེད།
རྒྱལ་སྤྱིའི་པེན་རྩོམ་པ་པོའི་མཐུན་ཚོགས་ནི་ཕྱི་ལོ་༡༩༢༡ ལོར་དབྱིན་ཡུལ་གྱི་རྒྱལ་ས་ལོན་ཊོན་དུ་ཐོག་མར་བཙུགས་ཤིང་། འདས་པའི་ལོ་ངོ་བརྒྱད་ཅུའི་རིང་སྐད་ཡིག་དང་རིག་གཞུང་མི་འདྲ་བའི་རྒྱལ་ཁབ་ཁག་བརྒྱ་དང་བཅུ་བཞིའི་ནང་པེན་རྩོམ་པ་པོའི་མཐུན་ཚོགས་ཀྱི་ཡན་ལག་ཚོགས་སྡེ་ཁག་བརྒྱ་དང་བཅུ་བཞི་བཙུགས་ཡོད་ཅིང། རྒྱལ་སྤྱིའི་རྩོམ་པ་པོའི་ཚོགས་སྡེ་འདི་ནི་འཛམ་གླིང་ནང་འགྲོ་བ་མིའི་ཐོབ་ཐང་རྩོད་ལེན་བྱེད་མཁན་གྱི་གཞུང་འབྲེལ་མིན་པའི་ཚོགས་པ་ཐོག་མ་དང། སྨྲ་བརྗོད་རང་དབང་དང་རྩོམ་རིག་གཉིས་ཁ་འབྲལ་ཐབས་མེད་པར་ངོས་འཛིན་བྱེད་མཁན་གྱི་ཚོགས་སྡེ་ཐོག་མ། རྒྱལ་སྤྱིའི་རང་བཞིན་གྱི་རྩོམ་པ་པོའི་ཚོགས་སྡེ་ཐོག་མ་ཆགས་ཡོད་ཅིང། ད་ལྟའི་ཆར་རྒྱལ་སྤྱིའི་པེན་གྱི་ཚོགས་སྡེ་ལ་བཙོན་དུ་ཚུད་པའི་རྩོམ་པ་པོའི་སྡེ་ཚན། བུད་མེད་རྩོམ་པ་པོའི་སྡེ་ཚན། ཞི་བདེར་ཕྱོགས་པའི་རྩོམ་པ་པོའི་སྡེ་ཚན། ལོ་ཙཱ་དང་སྐད་ཡིག་རང་དབང་གི་སྡེ་ཚན་བཅས་སྡེ་ཚན་ཆེན་པོ་ཁག་བཞི་ཡོད་པ་རེད། པེན་ཕྱི་སྡོད་བོད་ཀྱི་རྩོམ་པ་པོའི་མཐུན་ཚོགས་ནི་ཕྱི་ལོ་༡༩༩༩ལོའི་ཟླ་༣ ཚེས་༡༩ ཉིན་བཞུགས་སྒར་དྷ་རམ་ས་ལར་དབུ་བརྙེས་ཤིང་། ཕྱི་ལོ་༢༠༠༢ལོའི་ཟླ་དགུ་བ་ནས་རྒྱལ་སྤྱིའི་པེན་གྱི་ཡན་ལག་ཆགས་ཡོད་པ་རེད།
