༧གོང་ས་མཆོག་གི་ཨོ་སི་ཊོ་ལི་ཡའི་གྲོས་ཚོགས་འཐུས་མིར་མཇལ་འཕྲད།

དེ་ཡང་ཟླ་འདིའི་ཕྱི་ཚེས་༡༥ ཉིན་༧གོང་ས་མཆོག་གིས་ཨོ་སི་ཊོ་ལི་ཡའི་གྲོང་ཁྱེར་སི་ཌི་ནིའི་ནང་གྲོས་ཚོགས་འཐུས་མི་བོད་དོན་རྒྱབ་སྐྱོར་བ་ཁག་གཅིག་དང་ (Parliamentary Group for Tibet) ཨོ་སི་ཊོ་ལི་ཡའི་བོད་དོན་ལྷན་ཚོགས་ (Australia Tibet Council) ཀྱི་ཚོགས་མི་རྣམས་དང་མཇལ་འཕྲད་མཛད་ཡོད་པ་དང་། སྐབས་དེར་༧གོང་ས་མཆོག་གིས་བཀའ་སློབ་སྩལ་དོན། རྒྱ་ནག་ཁྱོན་ཡོངས་ཀྱི་གནས་སྟངས་ལ་འགྱུར་བ་མ་ཕྱིན་བར་བོད་ནང་གི་སྲིད་བྱུས་དེར་འགྱུར་བ་མི་ཡོང། རྒྱ་ནག་གི་སྲིད་བློན་ཟུར་པ་སྐུ་ཞབས་ཝུན་ཅ་པོས་ (Wen Jiabao) རྒྱ་ནག་གི་འགྲོ་བ་མིའི་ཐོབ་ཐང་དང་ཆབ་སྲིད་ཀྱི་གནས་སྟངས་ལ་བཅོས་བསྒྱུར་གཏོང་ དགོས་སྐོར་གསུངས་ཡོད། ཕྱོགས་མཚུངས་མང་གཙོའི་ལས་འགུལ་བ་སྐུ་ཞབས་ལིའུ་ཞའོ་པོས་ (Liu Xiaobo) སྤྱི་ཚོགས་གུ་ཡངས་དགོས་སྐོར་སེམས་ཚབ་ཤུགས་ཆེ་བཏོན་པ་ལྟར། རང་དབང་ལྡན་པའི་འཛམ་གླིང་མི་མང་ཚོས་ཁོང་ལྟ་བུར་རྒྱབ་སྐྱོར་བྱ་རྒྱུའི་ལས་འགན་ཡོད།

ཡུན་རིང་ལོ་རྒྱུས་ལྡན་པའི་རྒྱ་ནག་རྒྱལ་ཁབ་ལྟ་བུ་གྲོགས་མེད་ཁྱེར་རྐྱང་དུ་འཇོག་རྒྱུའི་ཚབ་ཏུ་རྒྱལ་སྤྱིའི་ཁོར་ཡུག་ནང་འཇུག་ཐབས་བྱེད་དགོས་པ་དང་དུས་མཚུངས། བོད་ཀྱི་ཐུན་མིན་ཆོས་དང་རིག་གཞུང། སྐད་ཡིག ཁོར་ཡུག གོམས་གཤིས་སོགས་མི་ཉམས་རྒྱུན་འཛིན་བྱ་རྒྱུ་ཧ་ཅང་གལ་ཆེན་པོ་ཆགས་ཡོད། ཁྱེད་ཚོས་ད་བར་བོད་དོན་རྒྱབ་སྐྱོར་གནང་བར་སྙིང་ཐག་པ་ནས་བཀའ་དྲིན་ཆེ་ཞུ་རྒྱུ་ཡིན་ཞེས་བཀའ་སློབ་བསྩལ་བསྟུན། སི་ཌི་ནིའི་ཚོགས་ཁང་ནང་མང་ཚོགས་ ༡༡༠༠༠ བརྒལ་བར་བཀའ་ཆོས་མུ་མཐུད་གནང་ཡོད་པ་རེད།
ཆོས་འབྲེལ་གྲུབ་རྗེས་༧གོང་ས་མཆོག་དང་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ཏུམ་བྷ་ལོང་སྐྱེད་མོས་ཚལ་ Tumbalong Park དུ་བོད་དོན་འདུ་འཛོམས་ Gathering for Tibet ཞེས་པ་དེར་ཆིབས་བསྒྱུར་བསྐྱངས་ཡོད་འདུག་པ་དང་། འདུ་འཛོམས་དེའི་ཐོག་༧གོང་ས་མཆོག་གིས་བོད་ཀྱི་ཁོར་ཡུག་གལ་གནད་ཆེན་པོ་ཡིན་སྐོར་དང་ལྷག་པར་ཨེ་ཤི་ཡའི་ཆུའི་ཐོན་ཁུངས་གཙོ་བོ་དེ་བོད་ཆགས་ཡོད་པར་བརྟེན། འཛམ་གླིང་གི་སྣེ་གསུམ་པར་གྲགས་བཞིན་ཡོད་པ་དང་། ཕྱི་ལོ་༡༩༧༤ ཙམ་ནས་བོད་མིའི་སྒྲིག་འཛུགས་ཀྱིས་རང་བཙན་མ་རྩོད་པར་རྒྱ་ནག་མི་དམངས་སྤྱི་མཐུན་རྒྱལ་ཁབ་ནང་མཉམ་སྡོད་བྱས་པ་ཡིན་ན་བོད་མི་ཚོ་ལའང་འཛུགས་བསྐྲུན་ཡར་རྒྱས་ཀྱི་ཁེ་ཕན་ཆེ་བ་ཐོབ་རྒྱུ་ཡིན་པ་མ་ཟད། རྒྱ་ནག་ལའང་ཁ་བྲལ་འགྲོ་རྒྱུའི་ཉེན་ཁ་མེད་པར་རྒྱ་བོད་མི་རིགས་གཉིས་ལ་གཉིས་སྨན་གྱི་ཐབས་ལམ་ཞིག་ལག་བསྟར་བྱས་ཡོད་སྐོར་དང། དེ་ལྟར་ཡོང་བར་རྒྱ་ནག་གཞུང་གི་རྩ་ཁྲིམས་ནང་གསལ་བའི་བོད་མི་ཚོར་མིང་དོན་མཚུངས་པའི་རང་སྐྱོང་གི་གནས་བབ་ཚད་ལྡན་ཞིག་སྤྲོད་དགོས་སྐོར་སོགས་ཀྱི་བཀའ་སློབ་གནང་ཡོད་པ་རེད།