བཙན་བྱོལ་བོད་གཞུང་གི་ཤེས་ཡོན་སྲིད་བྱུས་ཀྱི་གནས་བབས།
དེ་གཙང་མ་གཅིག་ཆགས་པ་རེད། ཤེས་རིག་ལས་ཁུངས་ཀྱི་ཐད་ཀའི་འ དགེ་རྒན་གྱི་ཆ་རྐྱེན་འཛོམས་རྒྱུ་དེ་དགོས་མཁོ་དང་པོ་རེད། ཤེས་ཡོན་སྲིད་བྱུས་ནང་གང་བཤད་པ་ནང་བཞིན་ལག་ལེན་དུ་བསྟར་ཐུབ་མཁན། བསྟར་འདོད་ཡོད་མཁན་དེ་འདྲ་དགེ་རྒན་འདང་ངེས་ཞིག་མ་བྱུང་བར་དུ་སྲིད་བྱུས་ཀྱི་ཐོག་ནས་ལག་ལེན་བསྟར་གྱི་ཡོད་ན། དོན་ངོ་མའི་ཐོག་ཇི་མ་ཇི་བཞིན་ལག་ལེན་མ་ཁེལ་བ་ཡོང་སྲིད་པ་ཞིག་རེད། དགེ་རྒན་དེ་འདྲ་ཞིག་ཡོང་རྒྱུར་ད་ལྟའི་ཤེས་ཡོན་སྲིད་བྱུས་ཡོད་པ་དེ་རང་གི་ནང་ནས་ཐོན་པའི་མི་མ་བྱུང་བར་དུ། སྔོན་མའི་སྲིད་བྱུས་གཞན་པའི་འོག་ནས་སློབ་སྦྱོང་ཐོན་པའི་མི་དེ་ཚོ་འགྱུར་བ་གཏོང་རྒྱུ་དང། ཡར་རྒྱས་གཏོང་རྒྱུ་ཁག་པོ་རེད་ལ། དུས་ཚོད་རིང་པོ་འགོར་རྒྱུ་རེད། ད་ལྟ་ང་ཚོས་འབད་བརྩོན་ཤུགས་ཆེ་ཤོས་དེ་དགེ་རྒན་གྱི་མཐུན་རྐྱེན་འཛོམས་ངེས་ཞིག་ཡོང་རྒྱུའི་ཐོག་འབད་བརྩོན་བྱེད་ཀྱི་ཡོད་པ་རེད། དགེ་རྒན་གྱི་མཐུན་རྐྱེན་འཛོམས་པའི་ཉིན་མོ་ནས་ཤེས་ཡོན་སྲིད་བྱུས་ལག་བསྟར་བྱེད་འགྲོ་ཡི་རེད་བསམ་གྱི་འདུག ལག་ལེན་བསྟར་རྒྱུ་མིན་པ་ཐག་གཅོད་གནང་ནས་ཕེབས་མཁན་ཚོར་ང་ཚོས་ལག་ལེན་མ་ཐུབ་པའི་རྒྱུ་མཚན་བཤད་དགོས་པ་ཡོད་པ་མ་རེད། ལག་ལེན་མ་བསྟར་བ་རེད་ཅེས་གསུངས་སོང།
ལག་ལེན་མི་བསྟར་རྒྱུ་ཐག་གཅོད་གནང་མཁན་སྡེ་ཚན་གང་དང་གང་ཡིན་ཞེས་དྲིས་པར། ཁོང་གིས་གསུང་དོན། བོད་སློབ་འཛིན་སྐྱོང་ཚོགས་པའི་འོག་ཏུ་ཡོད་པའི་སློབ་གྲྭ་དེ་ཚོའི་ནང་ང་ཚོས་འདི་འདྲ་ཞིག་བྱེད་དགོས་པ་རེད་ཅེས་ལམ་སྟོན་བྱེད་རྒྱུའི་ཐབས་ལམ་ཡོད་པ་མ་རེད། དེ་རྒྱ་གར་གཞུང་གི་ཐད་ཀར་འཛིན་སྐྱོང་འོག་ཏུ་ཡོད་པའི་རང་སྐྱོང་སྡེ་ཚན་ཞིག་གིས་བྱེད་ཀྱི་ཡོད་པས། ཁོང་ཚོར་ང་ཚོས་རིམ་པས་སྐད་ཆ་བཤད་ནས་འགྲོ་རྒྱུ་ཞིག་རེད་མ་གཏོགས། ཁོང་ཚོ་འགྲོ་བཞིན་པའི་རྒྱ་གར་གྱི་CBSE ཞེས་པའི་འགྲོ་སྟངས་དེའི་ནང་ཕལ་ཆེར་ཁོ་རང་ཚོར་དཀའ་ངལ་འཕྲད་རྒྱུ་ཡོད་ཀྱི་རེད་བསམ་གྱི་འདུག དེ་བཞིན་བོད་ཕྲུག་ཁྱིམ་སྡེའི་འཛིན་སྐྱོང་འོག་ཏུ་ཡོད་པ་དེ་ཚོའི་ནང་དབྱེ་བ་ཕྱེ་ཡོད་པ་རེད། སློབ་གྲྭ་ཁ་ཤས་ནང་ལ་ལག་ལེན་བསྟར་གྱི་ཡིན། ཁ་ཤས་ནང་ལ་ལག་ལེན་བསྟར་གྱི་མིན་གསུངས་ཡོད་པ་རེད། བོད་ཕྲུག་ཁྱིམ་སྡེའི་འོག་ཏུ་བོད་པའི་སློབ་གྲྭ་ཁག་ཅིག་དང། དབུས་བོད་སློབ་འཛིན་ཚོགས་ཀྱི་འོག་ཏུ་ཡོད་པའི་སློབ་གྲྭ་ཁག་ཅིག་གི་ནང་ལ་འཛིན་སྐྱོང་གི་ཐོག་ནས་ལག་ལེན་བསྟར་མ་ཐུབ་པ་ཞིག་ཆགས་ཡོད་པ་རེད་ཅེས་གསུངས་སོང།
རྩ་བའི་ཤེས་ཡོན་སྲིད་བྱུས་དེ་ཡག་པོ་འདུག ཡིན་ནའང་སློབ་ཚན་མང་དྲགས་པའི་མཐོང་སྣང་ཡོང་གི་འདུག སློབ་གྲྭ་སྤྱིའི་འགྲོ་སྟངས་ཀྱི་སློབ་ཚན་དེ་ཆ་ཚང་དགོས་ཀྱི་ཡོད་པ་རེད། དེའི་ཐོག་བོད་པ་རང་གི་རིག་ལམ་དང། ཐ་ན་ཡིག་གཟུགས་ལ་སོགས་ཧ་ཅང་མང་པོ་འདུག དེ་ཡིན་ན་འབ་སུ་མ་འདུས་པའི་ཉེན་ཁ་འདྲ་མཐོང་གི་འདུག དེའི་ཐོག་དགོངས་ཚུལ་ག་རེ་ཡོད་ཅེས་དྲིས་པར། ཁོང་གིས་གསུང་དོན། སློབ་ཚན་མང་དྲགས་ཡོད་པ་མ་རེད་བསམ་གྱི་འདུག སྤྱིར་བཏང་རྒྱ་གར་གྱི་ཤེས་ཡོན་ལམ་སྲོལ་ནང་ལ་སློབ་ཚན་མང་དྲགས་འདུག ཁྱད་པར་དུ་སློབ་དེབ་མང་དྲགས་འདུག་ལབ་མཁན་མང་པོ་ཡོད་པ་རེད། ང་ཚོས་ད་ལྟའི་ཤེས་ཡོན་སྲིད་བྱུས་འདི་ལྟ་བུར་ཆ་བཞག་ན། ཟིན་བྲིས་སྐབས་ལ་དམའ་རིམ་ནང་སློབ་ཚན་ཧ་ཅང་ཉུང་ཉུང་རེད། མཐའ་མའི་གཏན་འབེབས་སྐབས་ཕྲན་བུ་མང་དུ་ཕྱིན་པ་རེད། ཡིན་ནའང་ད་ལྟ་ང་ཚོས་འཛིན་གྲྭ་ལྔ་པའི་བར་དུ་སློབ་དེབ་སློབ་ཀྱི་ཡོད་པ་མ་རེད། ངག་ཐོག་ནས་སློབ་སྦྱོང་སྤྲོད་ཀྱི་ཡོད་པ་རེད། དེ་ཉིན་རེ་ཉིན་རེའི་སློབ་ཚན་གྱི་འགྲོ་སྟངས་བྱས་དུས། སློབ་ཚན་མང་དྲགས་འདུག་བསམ་པ་ཞིག་ང་ཚོས་མཐོང་མ་སོང། སློབ་ཚན་མང་ཉུང་ག་འདྲ་ཞིག་ཡིན་ནའང་དེའི་སློབ་སྟངས་དང། འཛིན་གྲྭའི་ནང་དང་འཛིན་གྲྭའི་ཕྱི་ལོགས་སུ་ཕྲུ་གུ་མཉམ་པོར་ལས་གཞི་དེ་ཚོ་འཛོམས་པ་ཞིག་བཟོ་ཡི་ཡོད་པ་རེད་མ་གཏོགས། སློབ་ཚན་རེ་རེར་འཛིན་གྲྭ་རེ་རེ་འཚོགས་ན་ཧ་ཅང་ལྗིད་ཁོག་ཆེན་པོ་ཞིག་ཡོད་པ་མ་རེད་ཅེས་འགྲེལ་བརྗོད་གནང་སོང།།
