བཀའ་སློབ་ངོསྤྲོད།
ཨ་མེ་རི་ཀའི་སློབ་གྲྭ་མང་པོར་དེང་སྐབས་བོད་ཡིག་འཛིན་གྲྭ་བཙུགས་ནས་བོད་ཡིག་ལ་མཐོང་ཆེན་བྱེད་ཀྱི་འདུག ང་ཚོས་བོད་ཡིག་སློབ་མི་ཐུབ་པ་ཐབས་སྐྱོ་བོ་དེ་འདྲའི་མཚམས་ལ་སླེབས་ཡོད་པ་མ་རེད། ཕྱིན་ཆད་བོད་ལ་བོད་ཡིག་གཙོ་བོ་བྱེད་རྒྱུའི་ཐད་སྲིད་ཇུས་དང་ཐ་ན་ཁྲིམས་སྲོལ་འགའ་ཞིག་མ་བཙུགས་རང་འཛུགས་རེད། ཅེས་དང༌།
ངའི་གོ་ཐོས་ལ་ནག་ཆུའི་འབྲོག་པའི་ཁྱིམ་དུད་གཅིག་གི་བུ་མོ་གཅིག་རྒྱ་ནག་སློབ་གྲྭར་བང་སྟེ། ལོ་ཁ་ཤས་སོང་རྗེས་བུ་མོ་དེ་ཡར་ཡོང་ནས་སྤགས་ཟ་ཡི་མེད་པ་དང༌། ཇ་འཐུང་གི་མེད་པས་ཨ་མ་དེ་འུ་ཐུག་ནས་ད་གུང་ཁྲན་ཏང་གིས་ངའི་བུ་མོ་དེ་སྐུ་དྲག་གི་བུ་མོ་ཞིག་གསོ་སྐྱོང་བྱས་འདུག་ཅེས་བརྗོད། སྐུ་དྲག་གིས་ཀྱང་སྤགས་ཟ་ཡི་རེད། དཔེར་ན་ང་ནི་བཀས་བཀོད་རྒྱུད་འཛིན་ཞིང་བྲན་ལམ་ལུགས་སྐབས་བོད་ཀྱི་གཙོ་བོ་ཨང་གཉིས་པ་དེ་ཡིན་ཡང་ངས་སྤགས་ཟ་ཡི་ཡོད། ཇ་འཐུང་གི་ཡོད།
ཡང་ལུང་བ་གཅིག་གི་བུ་མོ་རྒྱ་ནག་ཏུ་སློབ་སྦྱོང་བྱེད་པར་ཕྱིན་ནས་ཡར་སླེབས་རྗེས། ཁོ་མོས་རྒྱ་སྐད་ལ་སྐད་ཕུན་སུམ་ཚོགས་པོ་ཡོད་པ་དང་བོད་སྐད་ལ་སྐད་འདང་གི་མི་འདུག་ཟེར་ཏེ་རང་གི་ཕ་མ་ལ་རྒྱ་སྐད་ལས་བོད་སྐད་རྒྱག་གི་མེད་པ་རེད། ཕ་མ་གཉིས་རྒྱ་སྐད་མི་ཤེས་པས་འུ་ཐུག་ནས་ཁོ་མོར་ཁོག་ཏིར་ལ་རྒྱ་སྐད་ག་རེ་ཟེར་འདྲི་བས་ཁོ་མོས་ཤོད་ཤེས་ཀྱི་མེད་པ་རེད། མི་དེ་ཚོའི་གནས་ཚུལ་གྱིས་གུང་ཁྲན་ཏང་གི་ངོ་གདོང་ལ་ནག་པོ་བསྐུས་པ་རེད་དམ་དམར་པོ་བསྐུས་པ་རེད། འཛམ་གླིང་ཐོག་གུང་ཁྲན་ཏང་གི་མཚན་སྙན་དེ་ཡར་བཀྱག་པ་རེད་དམ་མར་འཐེན་པ་རེད། ལ་ལ་ཕར་ཕྱོགས་སུ་བསྡད་མཁན་ཚོར་མེ་སྒྱོགས་ཀྱི་མདེའུ་སྤྲད་རོགས་བྱས་པ་རེད་མ་རེད། བྱ་བ་དེ་རྒྱལ་གཅེས་རེད་དམ་རྒྱལ་ཁབ་ལ་གནོད་པ་
སྐྱེལ་བ་རེད། ཅེས་དང༌།ངས་རྒྱ་ཡིག་སྦྱོང་དགོས་ཀྱི་མ་རེད་ཟེར་བ་མིན། བོད་རིགས་གཅིག་ཡིན་ཕྱིན་སྔོན་ལ་བོད་ཡིག་ཡག་པོ་སྦྱོང་དགོས་ཀྱི་རེད། བོད་རིགས་གཅིག་ཡིན་ཕྱིན་བོད་ཡིག་མ་ཤེས་ན་ངོ་ཚ་རེད། ངའི་དགོན་པ་བཀྲ་ཤིས་ལྷུན་པོར་བོད་ཡིག་སྦྱོང་བའི་རྨང་གཞིའི་ཐོག་རྒྱ་ཡིག་སྦྱོང་གི་ཡོད། སྐད་ཡིག་ནི་མི་རིགས་དབྱེ་བ་ཕྱེ་སའི་མཚན་རྟགས་གཙོ་བོ་ཞིག་ཡིན་པས་སི་ཏ་ལིང་གིས་གསུང་བའི་མི་རིགས་ཀྱི་རྒྱུ་རྐྱེན་གཙོ་བོའི་ནང་སྐད་ཡིག་དེ་ཚུད་ཡོད་པ་རེད། ཅེས་དང༌། སློབ་གྲྭ་བའི་ད་ལྟའི་བསམ་བློ་དང༌། སྤྱོད་ཚུལ། ཀུན་སྤྱོད། བསམ་འདུན་ནི་བོད་ཀྱི་འབྱུང་འགྱུར་གྱི་ཚབ་ཡིན་པས་ད་ལྟ་ནས་བཟུང་ཁོ་ཚོར་གསོ་སྐྱོང་ཡག་པོ་བྱས་ན་མ་གཏོགས་བོད་ལ་རེ་བ་ཡོད་པ་མ་རེད། སློབ་གསོ་བས་མི་རིགས་ལ་འགན་ཁུར་བའི་སྙིང་སྟོབས་འཁྱེར་ནས་ལས་དོན་བྱས་ཏེ་མེས་རྒྱལ་ལ་འགན་ཁུར་དང༌། བོད་ལ་འགན་ཁུར་བྱེད་དགོས། ཞེས་དང༌།
རྗེ་སྐུ་འབུམ་རྒྱ་རྒྱུད་ཀྱི་བོད་རིགས་ཀྱིས་བོད་སྐད་རྒྱབ་མི་ཤེས་པ་དང༌། རྒྱ་ཆས་གྱོན་གྱི་ཡོད། ཁོ་ཚོ་རང་ཉིད་ཀྱི་བསམ་པའི་ནང་རང་ཉིད་བོད་ཡིན་བསམ་པ་མ་གཏོགས་བོད་རིགས་ཀྱི་ཁྱད་ཆོས་རྩ་བ་ནས་ཡོད་པ་མ་རེད། དོན་དེ་ལོ་ལྔ་བཅུ་དྲུག་ཅུ་སྔོན་གོ་མིན་ཏང་གི་སྐབས་འགོ་ཚུགས་པ་དང༌། ཀྲུང་གོ་གསར་བའི་སྐབས་མཐིལ་ཕྱིན་པ་དོན་འཁྱོལ་བྱུང་བ་རེད། དར་རྩེ་མདོ་ཡང་རྗེ་སྐུ་འབུམ་རྒྱ་རྒྱུད་ཀྱི་བོད་རིགས་དང་ཁྱད་པར་ཞེ་དྲག་མི་འདུག་ལོ་ལྔ་བཅུ་དྲུག་ཅུ་རྗེས་བོད་ཀྱང་དེ་འདྲར་གྱུར་ན་བོད་རིགས་ཡར་རྒྱས་བྱུང་འདུག་ཅེས་ཤོད་ཐུབ་བམ། ཞེས་དང༌། དཔེར་ན་ཡུན་ནན་དུ་སོག་པོ་ཁག་གཅིག་གཏན་སྡོད་བྱས་ཡོད་པས་ཁོ་ཚོ་ཕལ་ཆེར་ལོ་མང་སོང་བའི་དབང་གིས་སོག་སྐད་ཐོར་ནས་ཁོ་ཚོའི་སྐད་ཀྱི་ནང་བརྒྱ་ཆ་ཉི་ཤུ་ཙམ་སོག་སྐད་ཡིན་པ་དང༌། བརྒྱ་ཆ་བརྒྱ་ཅུ་ཐམ་པ་རྒྱ་སྐད་དང་ཡུན་ནན་ཞིང་ཆེན་གྱི་དེ་མིན་མི་རིགས་ཀྱི་སྐད་རེད། ནང་སོག་གིས་ས་གནས་དེར་ཆེར་མངགས་མི་བཏང་ནས་སོག་སྐད་བསླབ་པ་དང༌། སློབ་གྲྭ་བའི་སློབ་དེབ་ཀྱང་ནང་སོག་ནས་ཡོན་མེད་སྤྲད་པ་མ་ཟད། དགེ་རྒན་གྱི་གླ་ཕོག་ཀྱང་ནང་སོག་ནས་རང་བསྐུར་བྱས་པ་རེད། དེ་གའི་སོག་པོར་རང་མི་རིགས་ཀྱི་སྐད་སྦྱོང་བར་རོགས་རམ་བྱེད་རྒྱུ་དེ་ནི་རང་ཉིད་ཀྱི་འོས་འགན་ཡིན་ཟེར་གྱི་ཡོད་པ་རེད། མི་རིགས་གཞན་དག་གིས་བྱེད་ཐུབ་པ་དེ་ང་ཚོས་མི་ཐུབ་པའི་རྒྱུ་མཚན་གང་ཡིན་ནམ།