རྒྱ་གར་གྱི་ཉིན་གཅིག་ནང་ཏོག་ནད་ཐོན་མང་ཤོས་ཀྱི་ཟིན་ཐོ་གསར་པ་དེ་འབུམ་གཅིག་བརྒལ།
རྒྱ་གར་ནང་ཝུ་ཧན་ཏོག་དབྱིབས་ནད་དུག་གི་གནས་སྟངས་ཛ་དྲག་ཏུ་འགྲོ་བཞིན་པ་དང་བསྟུན། ཁ་སང་ཉིན་གཅིག་ནང་ཏོག་དབྱིབས་ནད་དུག་ཡོད་པ་ར་འཕྲོད་བྱུང་མཁན་གྱི་ཁ་གྲངས་འབུམ་གཅིག་བརྒལ་ནས། ཉིན་གཅིག་ནང་ཏོག་ནད་ཐོན་མང་ཤོས་ཀྱི་ཟིན་ཐོ་གསར་པ་ཆགས་འདུག
ཟླ་༤ པའི་ཚེས་༥ ཉིན་རྒྱ་གར་གྱི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ལོ་སྔོན་མའི་ཟླ་༩ པའི་ཚེས་༡༧ ཉིན་རྒྱ་གར་ནང་ཏོག་ནད་ཕོག་པ་ར་སྤྲོད་བྱུང་བའི་ཁ་གྲངས་དེ་༩༧,༨༩༤ བྱུང་ནས། སྐབས་དེར་ཉིན་གཅིག་ནང་ཏོག་ནད་གསར་དུ་ཕོག་མཁན་གྱི་ཁ་གྲངས་མཐོ་ཤོས་དེ་ཆགས་ནས་ཟིན་ཐོ་གསར་པ་ཆགས་ཡོད་པ་རེད་དེ། ཉེ་ཆར་ཟླ་༤ པའི་ཚེས་༤ ཉིན་རྒྱ་གར་ནང་ཏོག་ནད་གསར་དུ་ཕོག་མཁན་གྱི་ཁ་གྲངས་༡,༠༣,༥༥༨ བྱུང་ནས་ཉིན་གཅིག་ནང་ཏོག་ནད་ཐོན་མང་ཤོས་ཀྱི་ཟིན་ཐོ་གསར་པ་ཆགས་འདུག དེ་ཡང་ཉིན་དེར་མི་གྲངས་འབུམ་༩ མ་ཟིན་ཙམ་ལ་བརྟག་དཔྱད་བྱས་པ་ནས། འབུམ་༡ ལས་མང་བར་ཏོག་ནད་ཡོད་པ་ར་འཕྲོད་བྱུང་ཡོད་པ་ཡིན་འདུག
ཟླ་༡ པོའི་ནང་རྒྱ་གར་གྱི་ཉིན་རེའི་ཏོག་ནད་ཁ་གྲངས་དེ་༡༥,༠༠༠ ལས་ཉུང་བ་ཆགས་ནས། ཏོག་ནད་ཀྱི་གནས་སྟངས་ཡག་ཏུ་འགྲོ་ཡི་ཡོད་པའི་རྣམ་པ་ཐོན་ཡོད་ནའང། ཟླ་༢ པའི་ནང་ཉིན་རེའི་ཏོག་ནད་ཀྱི་ཁ་གྲངས་བསྟུད་མར་འཕར་ནས་ད་ཆ་གནས་སྟངས་ཛ་དྲག་ཆགས་ཡོད་པ་རེད། ཟླ་༢ པའི་ཚེས་༡༢ ཉིན་ཏོག་ནད་ན་བཞིན་པའི་ཁ་གྲངས་དེ་༡,༣༥,༩༢༦ ཡིན་ཁར་སྐབས་དེར་ཏོག་ནད་ན་བཞིན་པའི་ཁ་གྲངས་དམའ་ཤོས་ཡིན་འདུག འོན་ཀྱང་ད་ལྟའི་ཆར་ཏོག་ནད་ན་བཞིན་པའི་ཁ་གྲངས་དེ་༧,༤༡,༨༣༠ རེད་འདུག
ད་བར་རྒྱ་གར་ནང་ཏོག་ནད་ཕོག་པའི་ཁ་གྲངས་དེ་ས་ཡ་༡༢.༥ ཡིན་པ་དང་། མི་གྲངས་༡,༦༥,༠༠༠ ཡི་ཚེ་སྲོག་ཤོར་ཡོད་པ་རེད།
དེ་ཡང་རྒྱ་གར་གཞུང་དང་ཆེད་ལས་མི་སྣ་ཚོས་རྒྱ་གར་ནང་ཏོག་ནད་ཀྱི་ཁ་གྲངས་ཛ་དྲག་ངང་འཕར་བཞིན་པའི་རྒྱུ་མཚན་གཙོ་བོ་ནི་མི་མང་གིས་ལྷོད་ཡངས་བྱེད་ཀྱི་ཡོད་པ་དང་། དེ་བཞིན་རྒྱ་གར་ནང་སྲིད་དོན་དང་འོས་བསྡུའི་དྲིལ་བསྒྲགས་ལས་འགུལ། ཆང་ས་དང་ཆོས་ཕྱོགས་བྱེད་སྒོ་སོགས་ལ་མི་མང་འདུ་འཛོམས་ཕོན་ཆེན་བྱེད་ཀྱི་ཡོད་པས་ཡིན་སྐོར་བརྗོད་འདུག དེ་དང་བསྟུན་ནས་རྒྱ་གར་གྱི་ཉིན་རེའི་ཏོག་ནད་ཁ་གྲངས་ཕྱེད་ཀ་ཙམ་ཐོན་ཡུལ་གྱི་མངའ་སྡེ་མ་ཧཱ་ར་ཤི་ཀྲེ་རར་གཟའ་མཇུག་ཉིན་གཉིས་རིང་ཉིན་གང་མི་མང་འགྲོ་འོང་བཀག་སྡོམ་དང་། དེ་མིན་དགོང་མོ་ཆུ་ཚོད་༨ པ་ནས་ཞོགས་པའི་ཆུ་ཚོད་༧ པ་བར་འགྲོ་འོང་བཀག་རྒྱ་བཏང་འདུག
ད་ལྟའི་ཆར་རྒྱ་གར་དེ་འཛམ་གླིང་ནང་ཏོག་ནད་ཀྱི་ཁ་གྲངས་མཐོ་ཤོས་ཀྱི་རྒྱལ་ཁབ་གསུམ་པ་དེ་ཡིན་འདུག་པ་དང་། ད་བར་སྔོན་འགོག་སྨན་ཁབ་ས་ཡ་༦༨ ལས་མང་བ་བརྒྱབ་ཟིན་ཡོད་ཁར། ཟླ་༧ པའི་བར་དུ་མི་མང་ས་ཡ་༢༥༠ ལ་སྨན་ཁབ་བརྒྱབ་ཟིན་པ་བྱེད་འཆར་འདུག་ཀྱང་། ཆེད་ལས་པ་ཚོས་ཏོག་ནད་ཀྱི་གནས་སྟངས་ཛ་དྲག་ཏུ་འགྲོ་བར་བཀག་འགོག་ཆེད་དུ། སྨན་ཁབ་ཀྱི་ལས་དོན་ཤུགས་ཆེ་རུ་གཏོང་དགོས་སྐོར་བརྗོད་བཞིན་འདུག
ཧི་མ་ཅལ་མངའ་སྡེ་ལ་མཚོན་ན་ཟླ་༢ པའི་ནང་ཉིན་རེའི་ཏོག་ནད་ཁ་གྲངས་༥༠ ལས་ཉུང་བ་ཡིན་ཡང་། ད་ལྟའི་ཆར་ཉིན་རེའི་ཁ་གྲངས་དེ་༤༠༠ ལས་མང་བ་ཆགས་འདུག་པ་དང་། མངའ་སྡེ་གཞུང་གིས་ཏོག་ནད་ཀྱི་ཁ་གྲངས་འཕར་བཞིན་པ་དང་བསྟུན། སློབ་གྲྭ་ཁག་ཟླ་༤ པའི་ཚེས་༡༥ བར་སྒོ་རྒྱག་དགོས་པའི་བཀའ་རྒྱ་བཏང་ཡོད་པ་རེད། །
གསར་འགོད་པ་སྐལ་བཟང་དོན་གྲུབ།
