ཉི་ཧོང་གི་སྲིད་བློན་གསར་པ་འདེམས་ཐོན་བྱུང་འདུག
ཉི་ཧོང་གི་གཞུང་འཛིན་སྲིད་དོན་ཚོགས་པའི་འགོ་ཁྲིད་འོས་བསྡུའི་ནང་དུ། ཕྱི་སྲིད་བློན་ཆེན་ཟུར་པ་ཞིག་ལ་རྒྱལ་ཁ་ཐོབ་འདུག་པས། ཁོང་སྲིད་བློན་གསར་པ་ཆགས་རྒྱུ་གཏན་འཁེལ་ཡིན་ཡང་། ལོ་མཇུག་གི་རྒྱལ་ཡོངས་གྲོས་ཚོགས་འོས་བསྡུའི་ནང་རྒྱལ་ཁ་ལེན་དགོས་པའི་གནོན་ཤུགས་ཆེན་པོ་ཡོད་པ་རེད་འདུག
ཟླ་༩ པའི་ཚེས་༢༩ ཉིན་ཉི་ཧོང་གི་གཞུང་འཛིན་སྲིད་དོན་ཚོགས་པ་མང་གཙོ་གུ་ཡངས་ཚོགས་པའི་འགོ་ཁྲིད་འོས་བསྡུ་བྱས་ཡོད་པ་རེད། ལས་ཁུར་སྲིད་བློན་སྐུ་ཞབས་ཡཱོ་ཤི་ཧི་ཌེ་སུ་གྷ་ཡིས་ཏོག་དབྱིབས་ནད་དུག་སྔོན་འགོག་གི་ལས་དོན་ལ་དོ་སྣང་སྤྲོད་ཆེད་དུ། མང་གཙོ་གུ་ཡངས་སྲིད་དོན་ཚོགས་པའི་འགོ་ཁྲིད་ཀྱི་འོས་འགྲན་ནང་ཞུགས་རྒྱུ་མིན་པའི་ཐག་གཅོད་བྱས་ཡོད་འདུག་པས། སྲིད་བློན་ལས་གནས་ནས་རྩ་དགོངས་ཞུས་པ་ཆགས་ཀྱི་འདུག
འོས་བསྡུའི་སྔོན་དུ་མང་ཚོགས་ཁྲོད་ད་ཡོད་ཏོག་དབྱིབས་སྔོན་འགོག་སྨན་ཁབ་ཀྱི་བློན་ཆེན་དང་དེ་སྔོན་བདེ་སྲུང་བློན་ཆེན་བྱེད་མྱོང་བའི་སྐུ་ཞབས་ཊ་རུ་ཀཱོ་ནཱོ་ལ་རྒྱལ་ཁ་ཐོབ་རྒྱུའི་ཚོད་དཔག་ཆེན་པོ་བྱས་ཡོད་ཀྱང་། འོས་བསྡུའི་གྲུབ་དོན་དུ་ཕྱི་སྲིད་བློན་ཆེན་ཟུར་པ་རང་ལོ་༦༤ ཡིན་མཁན་སྐུ་ཞབས་ཧྥུ་མཱི་ཡོ་ཀཱི་ཤི་ཌ་(Fumio Kishida) ལ་རྒྱལ་ཁ་ཐོབ་ཡོད་པ་རེད།
ཁོང་གིས་ཉི་ཧོང་ནང་དུ་ཏོག་དབྱིབས་ནད་དུག་འཐབ་རྒོལ་ཆེད་དུ་འཕྲོད་བསྟེན་གྱི་ཛ་དྲག་གནས་སྟངས་ལ་གདོང་ལེན་བྱེད་མཁན་གྱི་ལས་ཁང་ཞིག་འཛུགས་རྒྱུ་དང་། རྒྱ་ནག་གཞུང་གིས་ཡུ་གུར་མི་རིགས་ཐོག་གི་བྱ་སྤྱོད་ལ་སྐྱོན་བརྗོད་བྱེད་པའི་གྲོས་ཆོད་འཇོག་རྒྱུར་རྒྱབ་སྐྱོར་བྱེད་མཁན་ཞིག་ཡིན་འདུག
ད་ལྟའི་ཆར་ཉི་ཧོང་གི་གྲོས་ཚོགས་ནང་དུ་གཞུང་འཛིན་མང་གཙོ་གུ་ཡངས་སྲིད་དོན་ཚོགས་པར་རྐུབ་སྟེགས་མང་མོས་ཡོད་པས། ཁོང་སྲིད་བློན་ཆགས་རྒྱུ་ངེས་གཏན་ཡིན་འདུག འོན་ཀྱང་ལོ་འདིའི་ལོ་མཇུག་ལ་ཉི་ཧོང་གིས་རྒྱལ་ཡོངས་གྲོས་ཚོགས་འོས་བསྡུ་གོ་སྒྲིག་བྱེད་འཆར་ཡོད་འདུག་པས། སྲིད་བློན་གསར་པ་ཁོང་གིས་ཏོག་དབྱིབས་ནད་དུག་དང་དེ་ལ་བརྟེན་ནས་དཔལ་འབྱོར་གྱི་ཤུགས་རྐྱེན་སོགས་ལ་གདོང་ལེན་བྱེེད་དགོས་པ་དང་། ལས་དོན་དེ་དག་ཡག་པོ་མ་བྱུང་ཚེ་འོས་བསྡུར་ཤུགས་རྐྱེན་ཐེབས་ངེས་པ་སོགས། གྲོས་ཚོགས་འོས་བསྡུར་རྒྱལ་ཁ་ཐོབ་པར་བྱེད་པའི་གནོན་ཤུགས་ཆེན་པོ་ཡོད་པ་རེད་འདུག
སྤྱིར་བཏང་ཁོང་ནི་སྲིད་དོན་པའི་ཁྱིམ་ཚང་ཞིག་ནས་ཡིན་པ་དང་། ཁོང་གི་ཕ་དང་སྤོ་སྤོ་གཉིས་ཀ་རྒྱལ་ཁབ་གྲོས་ཚོགས་མི་སྣ་བྱེད་མྱོང་ཡོད་འདུག ཁོང་གིས་ཕྱི་ལོ་༢༠༡༢ ནས་༢༠༡༧ བར་ཕྱི་སྲིད་བློན་ཆེན་བྱས་པས། ཕྱི་སྲིད་བློན་ཆེན་གྱི་ལས་ཁུར་རྒྱུན་རིང་ཤོས་བྱེད་མཁན་ཆགས་འདུག ཁོང་གི་སྐྱེས་ཡུལ་ནི་ཧཱི་རོ་ཤི་མཱ་ཡིན་པས། གྲོང་ཁྱེར་དེར་དམག་ཆེན་གཉིས་པའི་སྐབས་ཨ་རིས་རྡུལ་མཚོན་འཕངས་ནས་མི་རྒྱུ་གཉིས་ལ་གྱོང་གུད་ཆེན་པོ་བཏང་ཡོད་ཁར། རྡུལ་མཚོན་གྱི་ཤུགས་རྐྱེན་ད་དུང་ཡང་ཁུལ་དེར་ལྷག་ཡོད་པས། ཁོང་གིས་རྡུལ་མཚོན་ལ་ངོ་རྒོལ་ཆེན་པོ་བྱེད་ཀྱི་ཡོད་ཁར། ཕྱི་ལོ་༢༠༡༦ ལོར་ཨ་རིའི་སྲིད་འཛིན་ཨཱོ་བྷ་མ་ཧཱི་རོ་ཤི་མཱར་སྐོར་སྐྱོད་ཡོང་རྒྱུར་གོ་སྒྲིག་བྱེད་མཁན་གཙོ་བོ་དེ་ཡིན་པ་དང་། དེ་ནི་ཨ་རིའི་སྲིད་འཛིན་ལས་ཁུར་ཞིག་ཁུལ་དེར་སླེབས་པ་ཐོག་མ་དེ་ཆགས་འདུག
ཕྱི་ལོ་༢༠༢༠ ལོའི་ཟླ་༨ པའི་ཟླ་མཇུག་ཏུ་ཉི་ཧོང་གི་སྲིད་བློན་རྒྱུན་རིང་ཤོས་བྱེད་མཁན་ཤཱིན་ཛོ་ཨཱ་བྷི་ན་ཚའི་རྐྱེན་གྱིས་ལས་གནས་ནས་དགོངས་པ་ཞུས་ཡོད་པ་རེད། སྐབས་དེར་གཞུང་འཛིན་སྲིད་དོན་ཚོགས་པས་མང་ཚོགས་ལ་སྲིད་བློན་ཨཱ་བྷི་སྐབས་ཀྱི་བརྟན་ལྷིངས་རྒྱུན་མཐུད་ཀྱི་ཡོད་པའི་རྣམ་པ་སྟོན་ཆེད་དུ། ཁོང་དང་ལྟ་བ་ལངས་ཕྱོགས་མུ་མཐུད་རྒྱུན་སྐྱོང་བྱེད་མཁན་དང་ལོ་མང་ལས་ཀ་མཉམ་དུ་བྱེད་མྱོང་མཁན་ཡཱོ་ཤི་ཧི་ཌེ་སུ་གྷ་ལ། ཚོགས་པ་དེའི་སྐུ་ཚབ་༥༣༤ ཁོངས་ནས་མི་གྲངས་༣༧༧ ཡིས་འོས་ཤོག་འཕངས་ནས་འགོ་ཁྲིད་དུ་བདམས་ནས་སྲིད་བློན་དུ་བསྐོ་གཞག་བྱུང་ཡོད་པ་རེད། འོན་ཀྱང་ཁོང་གི་ལས་ཡུན་ལོ་གཅིག་ཙམ་གྱི་རྗེས་སུ་ལས་གནས་ནས་རྩ་དགོངས་ཞུ་རྒྱུའི་ཐག་བཅད་ཡོད་པ་རེད་འདུག །
གསར་འགོད་པ་སྐལ་བཟང་དོན་གྲུབ།
