བཙན་གཡེམ་གྱི་དཀའ་སྡུག་མྱངས་མྱོང་བའི་ལྷོ་ཀོ་རེ་ཡའི་བུད་མེད་དག་ལ་ཉི་ཧོང་གཞུང་གིས་གུན་གསབ་སྤྲོད་དགོས་ཟེར།
འཛམ་གླིང་དམག་ཆེན་གཉིས་པའི་སྐབས་སུ་ཉི་ཧོང་གི་དམག་མིས་ཆེད་དུ་ལྷོ་ཀོ་རེ་ཡའི་བུད་མེད་མང་པོ་ཞིག་བཙན་གྱིས་ཁྲིད་ནས་སྨད་འཚོང་མ་བྱེད་བཅུག་མྱོང་ཡོད་པར་བརྟེན། མི་ལོ་བཅུ་ཕྲག་འགའ་ཕྱིན་ཟིན་ན་ཡང་ད་ལྟ་འཚོ་གནས་ཡིན་པའི་བུད་མེད་དག་ལ་གུན་གསབ་སྤྲོད་དགོས་པའི་ཁྲིམས་གཏུག་བྱེད་ཀྱི་ཡོད་འདུག
ཕྱི་༢༤ ཉིན་སྦི་སྦི་སི་གསར་ཁང་གིས་གནས་ཚུལ་སྤེལ་གསལ་ལྟར་ན། ལོ་ན་༨༠ ནང་དང་༩༠ ནང་སླེབས་ཟིན་པའི་ལྷོ་ཀོ་རེ་ཡའི་བུད་མེད་༡༦་གིས་ལྷོ་ཀོ་རེ་ཡའི་ས་གནས་ཁྲིམས་ཁང་(Seoul Central District) ཟེར་བ་ཞིག་ལ། འཛམ་གླིང་དམག་ཆེན་གཉིས་པའི་སྐབས་སུ་ཉི་ཧོང་གི་དམག་མི་རྣམས་ཀྱིས་ལྷོ་ཀོ་རེ་ཡའི་བུད་མེད་མང་པོ་ཞིག་བཙན་འཁྲིད་དང་བཙན་གཡེམ་བྱས་ཡོད་པ་དག་གིས་ཕྱི་ལོ་༢༠༡༦ ནང་ཁྲིམས་གཏུག་བྱས་ཡོད་ཀྱང་། སྐབས་དེ་དུས་ས་གནས་ཁྲིམས་ཁང་དེ་ཡིས་ཁྲིམས་གཏུག་དེ་ལོ་ལྔའི་རིང་ཕྱིར་འགྱངས་བྱས་ནས། འདི་ལོར་བསྐྱར་དུ་ཁྲིམས་གཏུག་བྱེད་འགོ་བཙུགས་ཡོད་འདུག ས་གནས་ཁྲིམས་ཁང་གིས་བརྗོད་དོན་ལ། ལྷོ་ཀོ་རེ་ཡའི་ཁྲིམས་ཞིབ་ཁང་གིས་ངེས་པར་དུ་ཁྲིམས་གཏུག་བྱས་ནས་ད་ལྟ་འཚོ་བཞུགས་ཡིན་པའི་བུད་མེད་དེ་དག་ལ་གུན་གསབ་སྤྲོད་དགོས་ཀྱི་རེད། རྒྱུ་མཚན་ནི་ཁོང་ཚོ་ལ་མི་སྤྱོད་ལས་འདས་པའི་ཁྲིམས་འགལ་གྱི་བྱ་སྤྱོད་དེ་འདྲ་བྱས་ཡོད་པར་བརྟེན། ཁྲིམས་གཏུག་བྱས་པ་ནི་འོས་ཤིང་འཚམ་པ་ཞིག་རེད་ཅེས་བརྗོད་འདུག དེ་བཞིན་རྒྱལ་ནང་དུ་གནད་དོན་དེ་གང་འདྲ་བརྩི་མིན་ལ་མ་ལྟོས་པར་རྒྱལ་སྤྱིའི་ཁྲིམས་དང་འགལ་བའི་བྱ་སྤྱོད་ཅིག་ཡིན་པས་ངེས་པར་དུ་གུན་གསབ་སྤྲོད་དགོས་པ་ཞིག་རེད་ཅེས་བརྗོད་འདུག ད་ལྟ་རང་ལོ་༩༥ ཡིན་པའི་ལས་འགུལ་བ་དང་དེ་སྔོན་ཉི་ཧོང་གི་དམག་མིས་བཙན་གཡེམ་བྱས་མྱོང་བའི་བུད་མེད་(Lee Yong-soo)ཟེར་བ་མོས་ཚོར་བ་ཆེན་པོའི་ཐོག་ནས། ལྷོ་ཀོ་རེ་ཡའི་ཁྲིམས་ཁང་ལ་གནད་དོན་དེར་འགན་འཁུར་བྱས་པར་ཐུགས་རྗེེ་ཆེ་ཞེས་བརྗོད་ཡོད་འདུག་ལ། དེ་བཞིན་ཁོང་མོས་ངའི་རེ་བ་ལ་འདས་ཟིན་པའི་བུད་མེད་དེ་དག་རེ་རེ་ཡིས་དཀའ་སྡུག་ཇི་ལྟར་མྱོང་ཡོད་མེད་དང་། ཁོང་ཚོའི་ལོ་རྒྱུས་རྣམས་བཤད་ཐུབ་རོགས་བྱས་ན་བསམ་གྱི་འདུག སྐབས་དེ་དུས་བུད་མེད་ལོ་ཆུང་༢༠༠༠༠༠ ཙམ་ཡོད། ང་ཚོ་ཚང་མ་ཉི་ཧོང་གི་དམག་མི་རྣམས་ཀྱིས་བཙན་གཡེམ་ཆེད་དུ་བཙན་ཁྲིད་བྱས་པའི་བུད་མེད་རྐྱང་རྐྱང་ཡིན་པ་དང་། བུད་མེད་མང་ཆེ་བ་ནི་ཀོ་རེ་ཡ་ནས་ཡིན་ཞིང་། ཡང་འགའ་ཤས་རྒྱ་ནག་ནས་དང་ཧྥི་ལི་ཕིན། ཨིན་ཌོ་ནི་ཤི་ཡ། ཐེ་ཝན་བཅས་ནས་ཡིན་པར་བརྗོད་འདུག ཉི་ཧོང་གི་ཕྱི་འབྲེལ་བློན་ཆེན་(Yoko Kamikawa)་ཡིས་བརྗོད་དོན་ལ། མི་སྤྱོད་ལས་འདས་པའི་བྱ་སྤྱོད་དེ་འདྲ་བ་ཧ་ཅང་གིས་འགྱོད་པ་སྐྱེ་འོས་པ་ཞིག་རེད་ལ་སུས་ཀྱང་བྱ་སྤྱོད་དེ་རིགས་ལ་ངོས་ལེན་མི་ཐུབ་པ་ཞིག་རེད་ཅེས་བརྗོད་འདུག ལྷོ་ཀོ་རེ་ཡའི་གཞུང་གི་ངོས་ནས་རྒྱལ་སྤྱི་དང་མཐུན་པའི་ཐོག་ནས་ཁྲིམས་གཏུག་བྱས་ཏེ་བུད་མེད་དག་ལ་གུན་གསབ་བྱ་འོས་པ་ཞིག་རེད་བརྗོད་འདུག བཙན་གཡེམ་གྱི་དཀའ་སྡུག་མྱངས་མྱོང་བའི་ལྷོ་ཀོ་རེ་ཡའི་བུད་མེད་Lee Ok Seonཟེར་བ་ཞིག་ལ་སྦི་སྦི་སིས་བཅར་འདྲི་བྱེད་དུས་ཁོང་མོས་བརྗོད་དོན་ལ། ང་རང་ལོ་༡༥ ཡིན་དུས་ལྷོ་ཀོ་རེ་ཡའི་དམག་མི་ཞིག་དང་ཉི་ཧོང་གི་དམག་མི་ཞིག་བཅས་ཀྱིས་གསང་ལམ་ཞིག་ནང་དུ་བཅུག་ནས་བཙན་ཁྲིད་བྱས་བྱུང་། ཁོང་ཚོས་ང་དང་གཞན་བུད་མེད་མང་པོ་ཞིག་མེ་འཁོར་ནང་རྒྱ་ནག་ཏུ་ཁྱེར་སོང་། ང་ཚོ་ལ་མིང་(comfort women )ཟེར་གྱི་འདུག རྒྱུ་མཚན་གང་ཡིན་ངས་ཤེས་མ་སོང་། སྐབས་དེ་དུས་ང་ཚོ་ལ་ཉིན་གཅིག་ནང་སྐྱེས་པ་མང་པོས་བཙན་གཡེམ་བྱེད་ཀྱི་ཡོད་པར་བརྟེན། དཀའ་སྡུག་མ་བཟོད་ནས་བུད་མེད་མང་པོ་རང་ཤི་རྒྱག་མཁན་བྱུང་སོང་ཞེས་བུད་མེད་དེ་ཡིས་བརྗོད་ཡོད་འདུག
གཟའ་ལྷག་པ་ནམ་ཡིན་ལ་ལྷོ་ཀོ་རེ་ཡའི་ནང་ཡོད་པའི་ཉི་ཧོང་གཞུང་ཚབ་ཀྱི་མདུན་དུ་ཀོ་རེ་ཡའི་སློབ་མ་མང་པོས་ངོ་རྒོལ་དང་ཉི་ཧོང་གི་དམག་མིས་བཙན་གཡེམ་བྱས་པའི་བུད་མེད་འདས་པོ་རྣམས་ལ་རྗེས་དྲན་བྱེད་ཀྱི་ཡོད་འདུག
གསར་འགོད་པ། བསོད་ནམས་ཕུན་ཚོགས།
