མཁན་ཆེན་གྲུབ་དབང་ལུང་རྟོགས་རིན་པོ་ཆེ་རྗེས་སུ་དྲན་པ།
བསྟན་སྲིད་གཤེད་མ་དམར་པོ་ཐད་གར་ལངས་སྐབས།།
སྙིང་སྟོབས་བརྒྱ་ཕྲག་དུས་མིའི་གོ་ཆ་བགོས་ཏེ།།
བོད་བརྒྱུད་ནང་བསྟན་ཆེན་མོ་སླར་གསོ་བྱས་ཏེ།།
བསྟན་པའི་སྒྲོན་མེ་སྤར་བའི་མཛད་བཟང་དྲན་ནོ།།
ཕ་གཅིག་འཇིགས་མེད་རྒྱལ་པོའི་ཐུགས་ཀྱི་བུ་ཆེན།།
རྟོག་པའི་གཤོག་རྩལ་རྒྱས་པའི་སྔ་འགྱུར་གདོང་སྲས།།
བསྟན་པའི་མཛད་བཟང་སྐྱོང་བའི་སྐྱེ་མཆོག་དམ་པ།།
ཞིང་ཁམས་གཞན་ལ་གཤེགས་པའི་སེམས་འདི་སྐྱོ་བ།།
ཉེ་བརྒྱུད་བྱིན་རླབས་རྩལ་ཁ་ལྷག་པར་རྣོ་བའི།།
བདེན་ཞེན་ཐོལ་གྱིས་གཏོར་བའི་སྐྱེ་མཆོག་དམ་པ།།
ཆོས་བརྒྱད་ན་བུན་སྟུག་པོ་ཕ་མཐར་གཡུགས་ཏེ།།
ཡ་ཆེན་ཆོས་སྒར་བཞག་ནས་གང་དུ་ཕེབས་སོང་།།
འདི་སྣང་ཞེན་ཆགས་བྲལ་བའི་མི་ལས་བརྒྱུད་འཛིན།།
ལྟ་བའི་གཤོག་རྩལ་རྒྱས་པའི་ཀློང་ཆེན་གདོང་རྒྱུད།།
སྒོམ་པའི་གདེང་ཆེན་རྙེད་པའི་མི་ཕམ་ཟླ་བོ།།
བདེ་ལྡན་དག་པའི་ཞིང་ལ་ཕེབས་པ་ཅི་ཡིན།།
ལྷག་རླུང་དྲག་ཏུ་ལྡང་བའི་བྱང་མཐའ་འདི་ནས།།
སེམས་ཁམས་འཁྱག་གི་བསྡམས་པའི་སྐྱོ་གདུང་རེ་རེ།།
དམར་ཆུང་དཀྱིལ་ན་ལྡང་བའི་འཕག་འཚག་རེ་རེ།།
མ་བཅོས་སྙིང་ན་རྒྱུ་བའི་སེམས་འདི་གྲང་བ།།
སེམས་ཀྱི་སྐྱོ་གདུང་འཕྱུར་བའི་སྙིང་རླུང་དམར་པོ།།
བུ་སྡུག་སྨྱོན་པའི་གཟིར་བའི་ལོ་རྒྱུས་ནག་པོ།།
ས་མཐར་འཁྱམ་པའི་བུ་སློབ་ང་དང་ང་འདྲ།།
ཐུགས་ཆེན་བརྩེ་བའི་མ་འདོར་རྒྱང་རིང་ཉི་མ།།
ཡ་ཆེན་ཆོས་གྲྭ་ཆེན་མོའི་སློབ་ཚོགས་རྒྱ་མཚོས།།
གདུང་སེམས་རྔམ་ཁའི་ཀློང་ན་དྲན་གདུང་དམར་པོ།།
ཉིན་མཚན་བར་མེད་གྱེར་བའི་ལོ་ཟླ་ནག་པོ།།
བྲང་གཞུང་བར་ན་བཞུར་བའི་སྐྱོ་གདུང་གྲངས་མེད།།
ངེས་དོན་བསྟན་པའི་བདག་པོ་གྲུབ་དབང་ལོང་རྟོག།
འོད་གསལ་ཐེག་དགུའི་བདག་པོ་ཀློང་ཆེན་གཉིས་པ།།
སྙིགས་དུས་བསྟན་པའི་བདག་པོ་མཚོ་འཁྲུངས་རྒྱལ་ཚབ།།
མཁའ་སྤྱོད་མཁའ་འགྲོའི་ཞིང་ལ་ཕེབས་པ་སྔ་དྲག།།
སྔ་འགྱུར་བསྟན་པའི་གསལ་བྱེད་གྲུབ་དབང་ལོང་རྟོག།
ཉེ་ལམ་འོད་གསལ་ཐེག་དགུའི་ཤིང་རྟ་ཆེན་མོ།།
རིག་འཛིན་ཀློང་གསལ་སྙིང་པོའི་ཡང་སྲིད་མ་ནོར།།
ཞི་བའི་དབྱིངས་ལ་གཟིམས་པའི་སེམས་འདི་སྐྱོ་བ།།
བསྟན་འཛིན་སྟོང་གི་ཐུགས་སྲས་ཕ་གཅིག་འཇིགས་མེད།།
ངེས་དོན་སྐྱེ་བུ་དམ་པ་གྲུབ་དབང་ལོང་རྟོག།
གདོད་མིའི་ཕ་ཁྱིམ་དཀར་པོ་ཤུལ་དུ་བཞག་ནས།།
ཉི་ཟླ་དུས་གཅིག་ཡལ་བའི་ནག་ཟླ་འདི་རེད།།
མཛད་དཀའི་བཀའ་དྲན་དཀར་པོ་སེམས་ལ་འཁྱིལ་སྐབས།།
སྐྱོ་བའི་སྣང་ཤེས་གསོན་པོ་ལྷག་ཏུ་ལྡང་སྐབས།།
རྗེས་དྲན་སེམས་ཀྱི་མཚོ་མོ་བར་མེད་སྐྱོམ་སྐབས།།
ཡའ་འདབ་སོར་མོའི་རྩེ་ནས་ཐོལ་གྱིས་ཤོར་སོང་།།
ཕ་ཡུལ་གསེར་ལྡན་ཀླུང་ནས་ལང་ཚོ་འབུས་པའི།།
གཞན་ཡུལ་ས་མཐའ་ཞིག་ནས་བག་ཡངས་རྒྱུ་བའི།།
གྲུབ་དབང་ལུང་རྟོག་དྲན་པའི་རྟོག་འགྱུ་དམར་པོ།།
གསེར་སྨྱོན་བུ་ངས་ཀང་ར་རྫོང་ནས་བྲིས་སོ།།
ཕ་ཡུལ་གྱི་རི་ཆུ་ལ་བརྩེ་དུངས་ཀྱི་སེམས་དྲོད་ལྷག་པར་ཆེ་བའི་གསེར་རྟ་པ་
བསོད་ནམས་ཕུན་ཚོགས་སམ་དཔལ་ཤུལ་འབྲོས་སྲས་སུ་འབོད་པས་བོད་ཀྱི་རྒྱལ་ས་གཉིས་པ་བཞུགས་སྒར་རྡ་རམ་ས་ནས་སྐྱོ་གདུང་གི་སྣང་ཤེས་གསོན་པོ་ཞིག་བར་མེད་དྲན་ངོགས་ན་རྒྱུ་སྐབས་རང་ཤག་བསིལ་རླུང་རྒྱུ་སའི་རབ་གསལ་འགྲམ་ནས་སུག་བྲིས་བགྱིས་སོ།། ༢༠༠༡༡ ༩ ༩༩