དབྱིན་ཡུལ་གྱིས་རྒྱ་ནག་གཞུང་ཚབ་ཁང་གསར་རྒྱག་ལ་ཆོག་མཆན་སྤྲད་འདུག

དབྱིན་གཞུང་གིས་རྒྱལ་ཁབ་ཀྱི་བདེ་འཇགས་ལ་ཉེན་ཁ་ཡོད་མེད་ལ་མ་ལྟོས་པར་རྒྱ་ནག་དང་འབྲེལ་བ་ཡག་ཏུ་གཏོང་ཆེད་ལོན་ཌོན་དུ་རྒྱ་ནག་གི་གཞུང་ཚབ་ཁང་གསར་རྒྱག་བྱ་རྒྱུར་ཆོག་མཆན་སྤྲད་ཡོད་འདུག

ཕྱི་ལོ་༢༠༢༦ ཟླ་༡ ཚེས་༢༠ ཉིན། རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། དབྱིན་གཞུང་གིས་རྒྱ་ནག་ལ་དབྱིན་ཡུལ་དུ་གཞུང་ཚབ་ཁང་ཆེ་ཤོས་དེ་རྒྱག་རྒྱུར་ཆོག་མཆན་སྤྲད་འདུག གནད་དོན་དེ་ནི་དབྱིན་ཇིའི་སྲིད་བློན་རྒྱ་ནག་ཏུ་མ་ཕེབས་གོང་། རྒྱལ་ཁབ་གཉིས་ཀྱི་འབྲེལ་བ་ཡག་ཏུ་གཏོང་ཆེད་ཡིན་པར་ངོས་འཛིན་བྱས་འདུག
དབྱིན་ཇི་དང་ཨ་རིའི་ཆབ་སྲིད་པ་མང་པོས་གཞུང་ཚབ་ཁང་དེ་ནི་རྒྱ་ནག་གིས་དབྱིན་ཇིའི་གཞུང་དང་དངུལ་རྩིས་ལས་ཁུངས་ཁག་ལ་གསང་ཉུལ་བྱེད་སའི་ལྟེ་གནས་ཤིག་ཏུ་འགྱུར་རྒྱུའི་ཉེན་ཁ་ཡོད་པའི་ཉེན་བརྡ་བཏང་པར། དབྱིན་ཇིའི་གསང་བའི་ལས་ཁུངས་ཀྱིས་ཉེན་ཁ་ཡོད་པ་ཁས་ལེན་བྱས་ཡོད་ནའང་། ཉེན་ཁ་དེ་དག་སྔོན་འགོག་དང་དོ་དམ་བྱེད་ཐུབ་པའི་ཐབས་ལམ་ཡོད་སྐོར་བཤད་དེ་ཆོག་མཆན་སྤྲོད་རྒྱུར་རྒྱབ་སྐྱོར་བྱས་ཡོད་འདུག
ཐག་གཅོད་དེ་ནི་དབྱིན་ཇིའི་སྲིད་བློ་ཁེར་ སེ་ཊ་མར་(Keir Starmer)ཟླ་འདིའི་ནང་རྒྱ་ནག་ཏུ་གཟིགས་སྐོར་ལ་མ་ཕེབས་གོང་ཁྱབ་བསྒྲགས་བྱས་པ་ཡོད་པ་དང་། དེ་ནི་ཕྱི་ལོ་༢༠༡༨ ལོ་ནས་བཟུང་དབྱིན་ཇིའི་འགོ་ཁྲིད་ཅིག་རྒྱ་ནག་ཏུ་ཕེབས་པ་ཐེངས་དང་པོ་དེ་ཆགས་རྒྱུ་ཡིན་འདུག དབྱིན་ཇི་དང་རྒྱ་ནག་གི་དཔོན་རིགས་འགས་དབྱིན་ཇིའི་སྲིད་བློན་གྱི་གཟིགས་སྐོར་དེ་གཞུང་ཚབ་ཁང་རྒྱག་རྒྱུའི་ཆོག་མཆན་ཐོབ་མིན་ལ་རག་ལས་ཡོད་ཅེས་བརྗོད་འདུག
རྒྱ་ནག་གཞུང་གིས་ཕྱི་ལོ་༢༠༡༨ ལོར་ས་ཆ་དེ་ཉོས་ཡོད་ཀྱང་། ཕྱི་ལོ་༢༠༢༢ ལོར་ས་གནས་ལྷན་ཚོགས་ཀྱིས་གཞུང་ཚབ་ཁང་གསར་རྒྱག་གི་འཛུགས་སྐྲུན་ཆོག་མཆན་སྤྲད་མེད་ཅིང་། ན་ནིང་རྒྱ་ནག་གི་སྲིད་འཛིན་ཞི་ཅིན་ཕིང་གིས་དབྱིིན་ཇིའི་སྲིད་བློན་སེ་ཊ་མར་ལ་གནད་དོན་འདིའི་ནང་ཐེ་གཏོགས་བྱེད་དགོས་པའི་རེ་སྐུལ་བྱས་ཡོད་འདུག
འདས་པའི་ལོ་ངོ་གསུམ་གྱི་རིང་། ལོ་ངོ་ཉིས་བརྒྱའི་ལོ་རྒྱུས་ལྡན་པའི་(Royal Mint Court)ཞེས་པའི་ས་ཆའི་ཐོག་རྒྱ་ནག་གིས་གཞུང་ཚབ་ཁང་གསར་པ་ཞིག་རྒྱག་རྒྱུའི་འཆར་གཞི་དེར། ས་གནས་མི་མང་དང་བོད་པ། ཁྲིམས་རྩོད་པ་དང་ཧོང་ཀོང་གི་མང་གཙོ་དོན་གཉེར་བ་བཅས་ཀྱིས་ངོ་རྒོལ་གྱི་ལས་འགུལ་ཤུགས་ཆེན་སྤེལ་ཡོད་པ་མ་ཟད། ས་གནས་མི་མང་གིས་གཞུང་གི་ཐག་གཅོད་དེར་ཁྲིམས་ཐོག་ནས་མུ་མཐུད་ངོ་རྒོལ་བྱེད་རྒྱུ་ཡིན་ཞེས་བརྗོད་ཡོད་འདུག ལྷག་པར་དུ་དབྱིན་ཇིའི་ཕྱོགས་འགལ་ཚོགས་པས་གཞུང་གི་ཐག་གཅོད་དེ་ནི་ངོ་ཚ་དགོས་པའི་སྡར་མའི་བྱེད་སྟངས་ཞིག་ཡིན་པར་སྐྱོན་བརྗོད་བྱས་ཡོད་འདུག
འདས་པའི་ལོ་བཅུ་ཕྲག་ནང་དབྱིན་ཇི་ནི་ཡུ་རོབ་ནང་གི་རྒྱ་ནག་གི་རྒྱབ་སྐྱོར་པ་ཆེ་ཤོས་ནས་སྐྱོན་བརྗོད་པ་ཆེ་ཤོས་སུ་གྱུར་ཡོད་ནའང་། ད་ལྟ་སྲིད་བློན་སེ་ཊ་མར་གྱིས་ཚོང་འབྲེལ་དམ་ཟབ་ཏུ་གཏོང་རྒྱུ་ནི་རྒྱལ་ཁབ་ཀྱི་ཁེ་ཕན་རེད་ཅེས་གསུངས་ཏེ་འབྲེལ་བ་བསྐྱར་གསོ་བྱེད་ཐབས་བྱེད་ཀྱིན་ཡོད་འདུག
རྒྱ་གཞུང་གིས་གཞུང་ཚབ་ཁང་རྒྱག་ས་དེ་ཕྱི་ལོ་༢༠༡༨ ལོར་སྒོར་ས་ཡ་༢༥༥ སྤྲད་ནས་ཉོས་ཡོད་པ་དང་། ས་ཆ་དེར་ཁྱོན་མི་ཊར་གྲུ་བཞི་མ་༢༠༠༠༠ ཡོད་ཅིང་། དེ་ནི་ཡུ་རོབ་ནང་གི་རྒྱ་ནག་གི་གཞུང་ཚབ་ཁང་ཆེ་ཤོས་དེ་ཆགས་རྒྱུ་ཡིན་འདུག
ས་གནས་དེའི་འོག་ཏུ་དངུལ་རྩིས་ལས་ཁུངས་ཁག་གི་གནད་ཆེའི་གློག་འཕྲིན་སྐུད་ལམ་སོགས་ཡོད་པར་བརྟེན། རྒྱ་གཞུང་གིས་དེ་དག་གི་གསང་བར་ཉན་རྒྱུའི་དོགས་པ་བྱེད་ཀྱི་ཡོད་པ་དང་། ལྷག་པར་དུ་བོད་མི་དང་ཧོང་ཀོང་བ། མང་གཙོ་དོན་གཉེར་བ་ཚོས་གཞུང་ཚབ་ཁང་ཆེ་རུ་ཕྱིན་པ་དེས་དབྱིན་ཇིའི་ནང་ཡོད་པའི་རྒྱ་ནག་ལ་ངོ་རྒོལ་བྱེད་མཁན་ཚོར་གསང་ཉུལ་དང་དྲག་གནོན་ཆེ་རུ་གཏོང་རྒྱུའི་འཇིགས་སྣང་བྱེད་ཀྱི་ཡོད་འདུག།
གསར་འགོད་པ། བློ་བཟང་རྒྱ་མཚོ།