གསར་འགྱུར་གནད་བསྡུས་ཁག

ཟླ་འདིའི་ཚེས་༡༣ ཉིན་སྟེ་བོད་རབ་གནས་ཤིང་རྟ་ལོའི་ཧོར་ཟླ་༩ པའི་ཚེས་༢༢ ཉིན་ནི་སྟོན་པ་ལྷ་ལས་བབས་པའི་དུས་ཆེན་ཡིན་ལ། ལྷ་བབས་དུས་ཆེན་ནི་སྟོན་པ་ཐུབ་པའི་དབང་པོས་འདུལ་བྱ་རྣམས་ཐར་པ་དང་ཐམས་ཅད་མཁྱེན་པའི་གནས་སུ་འཁྲིད་ཐབས་སུ་མཛད་པ་བཅུ་གཉིས་སོགས་མཛད་པའི་རྣམ་གྲངས་མང་པོ་ཞིག་བསྟན་པའི་ནང་ཚན་ཞིག་ཡིན་པ་རེད།

ཟླ་འདིའི་ཚེས་༧ ནས་ཉིན་གསུམ་རིང་རྒྱ་གར་ལྷོ་ཕྱོགས་མོན་གྷོ་ས་གནས་སུ་རྟེན་གཞི་བྱས་པའི་དགའ་ལྡན་ཤར་རྩེ་ཐོས་བསམ་ནོར་གླིང་གྲྭ་ཚང་གི་གོ་སྒྲིག་འོག ཚད་མ་རྣམ་འགྲེལ་གྱི་ལེའུ་དང་པོ་དང་གཉིས་པ་གཉིས་ཀྱི་ཐོག་མཁས་པའི་བགྲོ་གླེང་ཞིག་དགའ་ལྡན་ཤར་རྩེའི་གྲྭ་ཚང་དུ་འཚོགས་ཡོད་པ་རེད།

བོད་མི་མང་སྤྱི་འཐུས་རྒྱུན་ལས་ནས་༢༠༡༤ ཟླ་༡༡ ཚེས་ ༥ ཉིན་རྒྱ་བལ་འབྲུག་གསུམ་ཁུལ་གྱི་བོད་རང་དབང་བདེན་པའི་ལས་འགུལ་གྱི་ཚོགས་ཆུང་ཁག་དང་། ཕྱི་རྒྱལ་ཡུལ་གྲུ་ཁག་གི་བོད་རིགས་སྤྱི་མཐུན་ཚོགས་པ་དང་། བོད་རིགས་ཚོགས་པ་བཅས་སོ་སོར་དང་བླངས་དཔྱ་དངུལ་ཆེད་ཕོགས་འབབ་བརྒྱ་ཆ་མ་སྤྲད་ན་ཡུལ་མིའི་ལས་འགན་མ་བསྒྲུབ་པར་ངོས་འཛིན་གསལ་བསྒྲགས་ཤིག་བཏང་ཡོད་པ་རེད།

ཕྱི་ཟླ་༡༠ པའི་ཚེས་༢༣ ཉིན་ནས་བཟུང་རྒྱ་གར་ལྷོ་ཕྱོགས་མོན་གྷོ་ས་གནས་སུ་རྟེན་གཞི་བྱས་ པའི་འབྲས་སྤུངས་བློ་གསལ་གླིང་གྲྭ་ཚང་དུ་ཟམ་གདོང་རིན་པོ་ཆེས་རྒྱལ་མཆོག་སྐུ་ཕྲེང་བདུན་པ་སྐལ་བཟང་རྒྱ་མཚོའི་ཁྲིད་ཡིག་ཐོག་ནས་དགའ་ལྡན་ལྷ་བརྒྱ་མ་དང་། དཔལ་མགོན་འཕགས་པ་ཀླུ་གྲུབ་ཀྱིས་མཛད་པའི་དབུ་མ་རྩ་བ་ཤེས་རབ་ཀྱི་བཀའ་ཆོས་ཉིན་གསུམ་རིང་གནང་གྲུབ་རྗེས། བློ་གསལ་གླིང་གྲྭ་ཚང་གི་ངོས་ནས་ཟམ་གདོང་རིན་པོ་ཆེ་ལ་བརྟན་བཞུགས་ཞིག་ཀྱང་ཕུལ་ཡོད་པ་རེད།

ཟླ་འདིའི་ཚེས་༣ ཉིན་གྱི་ཞོགས་པ་འབྲས་སྤུངས་བློ་གསལ་གླིང་གི་མཁན་ཟུར་བྲབ་གཡབ་རྟོག་ལྡན་རིན་པ་ཆེ་དང་། འབྲས་སྤུངས་བློ་གསལ་གླིང་གི་མཁན་པོ་བློ་བཟང་ཡེ་ཤེས། འབྲས་བློ་གླིང་གྲྭ་ཚང་དང་དཔལ་ལྡན་རྒྱུད་སྟོད་གྲྭ་ཚང་གི་ཕྱག་མཛོད། གཞན་ཡང་གནད་ཡོད་མི་སྣ་རྣམ་པས་ཞིང་གཤེགས་དམ་པ་ལྡན་མ་བློ་ཆོས་རིན་པོ་ཆེའི་སྐུ་གདུང་དེ་བཞིན་དྷ་སའི་གཟིམ་ཤག་ནས་སྟོད་རྒྱུད་གྲྭ་ཚང་དུ་གདན་ཞུ་ཞུས་ཡོད་པ་རེད།

ཟླ་འདིའི་ཚེས་༢༣ ཉིན་གྱི་ཕྱི་དྲོ་རྣམ་གྲྭ་མཁན་ཟུར་ལྡན་མ་བློ་ཆོས་རིན་པོ་ཆེ་དྷ་རམ་ས་ལའི་ཁོང་གི་གཟིམ་ཤག་ཏུ་དགོངས་པ་གཞན་དུ་གཤེགས་པའི་ཡིད་སྐྱོའི་གནས་ཚུལ་བྱུང་བར། འབྲས་སྤུངས་བློ་གསལ་གླིང་གྲྭ་ཚང་དང་སྒོ་མང་གྲྭ་ཚང་གཉིས་ཀྱིས་ཚོང་ཁང་སོགས་སྒོ་བརྒྱབ་ནས་མྱ་ངན་གུས་འདུད་ཞུས་པ་དང་།ཉིན་དེའི་ཕྱི་དྲོ་གྲྭ་ཚང་གཉིས་ཀྱི་འདུ་ཁང་ནང་གྲྭ་མང་འཚོགས་ནས་སྨོན་ལམ་གསུང་ཡོད་པ་རེད།