རྒྱ་ནག་གཞུང་གིས་འཛམ་གླིང་རྒྱལ་ཁབ་༥༣ ནང་གསང་བའི་ཉེན་རྟོག་ལས་ཁུངས་༡༠༠ ལྷག་བཙུགས་འདུག

རྒྱ་ནག་གཞུང་གི་བཀོད་སྒྲིག་འོག་འཛམ་གླིང་གི་རྒྱལ་ཁབ་ཁྱོན་༥༣ ཙམ་གྱི་ནང་གསང་བའི་ཉེན་རྟོག་ལས་ཁུངས་༡༠༠ ལྷག་བཙུགས་ཡོད་འདུག་པ་དང་། ལོ་སྔོན་མར་ཨ་རིའི་མེན་ཧ་ཊན་(Manhattan)གྱི་རྒྱ་རིགས་གྲོང་སྡེའི་ནང་རྒྱ་མི་གཉིས་ཀྱིས་གསང་བའི་ཉེན་རྟོག་ལས་ཁུངས་བཙུགས་པའི་ཉེས་མིང་འོག་འཛིན་བཟུང་བྱས་ཡོད་པ་དང་། ཁ་སང་གཟའ་ལྷག་པའི་ཉིན་ཁྲིམས་ཐག་བཅད་འདུག

ཕྱི་ཚེས་༡༩ ཉིན་བྷི་བྷི་སིའི་གསར་ཁང་གིས་གནས་ཚུལ་སྤེལ་གསལ་ལྟར་ན། ལོ་སྔོན་མ་ཨ་རིའི་གཞུང་གིས་ཨ་རིའི་མི་སེར་ཡིན་པའི་རྒྱ་མི་ཁྲེན་ཅིན་ཕིན་(Chen Jinping)ཟེར་བ་ཞིག་གིས་མེན་ཧ་ཊན་(Manhattan) དུ་ཡོད་པའི་རྒྱ་རིགས་གྲོང་སྡེའི་ནང་དུ་གསང་བའི་ཉེན་རྟོག་ལས་ཁུངས་བཙུགས་པའི་ཉེས་མིང་འོག་འཛིན་བཟུང་བྱས་ཡོད་འདུག མི་དེར་འདྲི་རྩད་བྱེད་སྐབས། ཁོ་པ་དང་ལུའུ་ཅན་ཝང་(Lu Jianwang)གཉིས་ཀྱིས་ཕྱི་ལོ་༢༠༢༢ ལོར་རྒྱ་ནག་གཞུང་གི་མི་དམངས་བདེ་འཇགས་ལྷན་ཁང་གི་བཀོད་སྒྲིག་འོག་གསང་བའི་ཉེན་རྟོག་ལས་ཁུངས་བཙུགས་པར་ཁས་ལེན་བྱས་འདུག ཨ་རིའི་གཞུང་གིས་ཤེས་རྟོགས་བྱུང་བར་གཞིགས་ན། རྒྱ་ནག་གཞུང་གི་བཀོད་སྒྲིག་འོག་འཛམ་གླིང་རྒྱལ་ཁབ་༥༣ ལྷག་གི་ནང་དུ་གསང་བའི་ཉེན་རྟོག་ལས་ཁུངས་༡༠༠ ལྷག་བཙུགས་ཡོད་འདུག འོན་ཀྱང་རྒྱ་ནག་གཞུང་གིས་གསང་བའི་ལས་ཁུངས་དེ་འདྲ་ནམ་ཡང་འཛུགས་མྱོང་མེད་ཚུལ་རྗོད་ཀྱི་ཡོད་འདུག

དེ་བཞིན་ཨ་རིའི་ས་གནས་མང་པོར་རྒྱ་ནག་གཞུང་གི་བཀོད་སྒྲིག་འོག་བཙུགས་པའི་གསང་བའི་ཉེན་རྟོག་ལས་ཁུངས་དེ་དག་གིས་རྒྱ་རིགས་རྣམས་ཀྱི་ཁ་ལོའི་ལག་འཁྱེར་དང་གཞན་ལག་འཁྱེར་རིགས་དུས་ཚོད་རྫོགས་པ་ན་དུས་འགྱངས་སོགས་ཀྱི་རོགས་རམ་བྱེད་ཀྱི་ཡོད་ཚུལ་རྗོད་ཀྱི་ཡོད་ནའང་། དོན་དངོས་ཐོག་ལས་ཁུངས་དེ་དག་གིས་ཨ་རིའི་ནང་ཡོད་པའི་རྒྱ་ནག་གི་གྲངས་ཉུང་མི་རིགས་དང་རྒྱ་རིགས་སོགས་མང་གཙོ་དོན་གཉེར་བ་རྣམས་ལ་ལྟ་རྟོག་བྱེད་ཀྱི་ཡོད་པ་དང་། དེ་བཞིན་རྒྱ་ནག་དམར་ཤོག་གཞུང་ལ་ངོ་རྒོལ་དང་ཁ་གཏད་གཅོག་མཁན་སུ་ཡོད་ན་རྒྱ་ནག་གཞུང་ལ་རྩིས་སྤྲོད་བྱེད་པ་སོགས་ཁྲིམས་འགལ་གྱི་བྱ་སྤྱོད་སྤེལ་གྱི་ཡོད་འདུག

ལོ་སྔོན་མའི་ཕྱི་ཟླ་༤ པའི་ནང་རྒྱ་རིགས་མི་གཉིས་པོ་དེ་མེན་ཧ་ཊན་(Manhattan’s Chinatown)གྱི་རྒྱ་རིགས་གྲོང་སྡེ་ནས་འཛིན་བཟུང་བྱས་ཡོད་པ་དང་། མི་དེ་གཉིས་ཀྱིས་རྒྱ་ནག་གཞུང་གི་ཚབ་བྱས་ནས་ཨ་རིའི་ནང་གསང་བའི་ལས་ཁུངས་བཙུགས་ཏེ་ལས་ཁུངས་དེའི་བརྒྱུད་ནས་ཨ་རིའི་མི་སེར་ཡིན་མཁན་མང་པོ་ཞིག་ལ་དཀའ་ངལ་ཆེན་པོ་བཟོས་ཡོད་འདུག ཁ་སང་ཕྱི་ཚེས་༡༨ གཟའ་ལྷག་པའི་ཉིན་ཨ་རིའི་གཞུང་གིས་རྒྱ་རིགས་དེ་གཉིས་ལ་ལོ་ལྔའི་བཙོན་འཇུག་ཁྲིམས་ཐག་བཅད་ཡོད་པ་དང་། ཁྲིམས་ཆད་དེ་ལོ་རྗེས་མ་ནས་འགོ་འཛུགས་བྱ་རྒྱུ་ཡིན་པར་བརྗོད་འདུག

གསར་འགོད་པ། བསོད་ནམས་ཕུན་ཚོགས།​​​​​​​​​​​​​​​​