༧གོང་ས་མཆོག་དགུང་གྲངས་༨༨ ལ་ཕེབས་པའི་སྐུའི་འཁྲུངས་སྐར་སྲུང་བརྩི།
བཞུགས་སྒར་རྡ་རམ་ས་ལར་ཐེག་ཆེན་ཆོས་གླིང་གཙུག་ལག་ཁང་དུ་༧གོང་ས་མཆོག་དགུངས་གྲངས་༨༨ ལ་ཕེབས་པའི་སྐུའི་འཁྲུངས་སྐར་སྲུང་བརྩི་ཟབ་རྒྱས་ཞུས་གནང་སོང་།
དེ་རིང་ཕྱི་ལ་ོ ༢༠༢༣ ཟླ་ ༧ ཚེས་ ༦ ཉིན༧་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༨ ལ་ཕེབས་པའི་སྐུའི་འཁྲུངས་སྐར་དུས་ཆེན་ཡིན་པ་ལྟར། སྐུའི་འཁྲུངས་སྐར་ཉིན་གོང་ས་མཆོག་ཐེག་ཆེན་ཆོས་གླིང་གཙུག་ལག་ཁང་དུ་ཞབས་སོར་འཁོད་ཡོད་པ་དང་མགོན་པོ་གང་གིས་སྐུའི་དགུང་གྲངས་གྱ་བརྒྱད་དུ་ཕེབས་ཡོད་ཀྱང་། ད་ལྟའི་སྐུ་གཟུགས་ཀྱི་གནས་བབ་དགུང་ལོ་ལྔ་བཅུ་ང་གྲངས་ལྟར་བདེ་ཐང་ཡིན་པ་དང་མ་འོངས་པར་དགུང་ལོ་བརྒྱ་དང་བཅུ་གྲངས་ཤིག་བཞུགས་ཀྱི་ཡིན་པའི་གཏམ་བཟང་གསུངས་སོང་། གཞན་ཡང་དེ་རིང་གི་མཛད་སྒོའི་སྐུ་མགྲོན་གཙོ་བོ་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་དང་དམིགས་བསལ་སྐུ་མགྲོན་ཐེ་ཝན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཞོན། ཉི་ཧོང་བོད་དོན་རྒྱབ་སྐྱོར་ཚོགས་པའི་ཚོགས་མི་ཁག་ཅིག་བཅས་ཕེབས་ཏེ་གསུང་བཤད་གནང་སོང་ལ། དེ་བཞིན་རྡ་སའི་སེར་སྐྱ་མི་མང་ཕོན་ཆེན་འཛོམས་པའི་ཐོག་ནས་བོད་ཀྱི་ཟློས་གར་ཚོགས་པ་སོགས་ཀྱིས་གླུ་དང་བྲོ་ཡི་མཆོད་པ་རྒྱ་ཆེར་ཕུལ་ཏེ་མགོན་པོ་གང་གི་འཁྲུངས་སྐར་ཟབ་རྒྱས་བསུས་སོང་།
དེ་རིང་གི་མཛད་སྒོའི་སྐབས་བོད་མིའི་སྒྲིག་འཛུགས་ཀྱི་བཀའ་ཤག་གི་གསུང་བཤད་ནང་༸མགོན་པོ་གང་ཉིད་བོད་དུ་བཞུགས་པའི་སྐབས་ནས་ཚན་རིག་འཕྲུལ་ཆས་ལ་ཐུགས་སྣང་ཆེན་པོ་ཡོད་པ་ཡོངས་གྲགས་ལྟར་དང་། བཙན་བྱོལ་དུ་ཕེབས་འབྱོར་བྱུང་རྗེས་ནུབ་ཕྱོགས་ཚན་རིག་སྐོར་ལ་ཐུགས་ཚོར་ཆེ་ཚུལ་དང་ཚན་རིག་མཁས་པ་རྣམས་དང་བགྲོ་གླེང་གནང་བ་སོགས་ཀྱི་སྐོར་གསུངས་སོང་། གཞན་ཡང་༡༩༨༤ ལོར་ཨེམ་ཧེར་སིཊ་(Amherst)མཐོ་སློབ་ཏུ་ཉིན་ལྔའི་རིང་སེམས་ཁམས་རིག་པ་དང་། གསོ་བ་རིག་པ། སྐྱེས་དངོས་རིག་པ། ཀླད་པའི་ཚན་རིག་བཅས་ཀྱི་མཁས་དབང་རྣམ་པ་དང་ལྷན་དུ་བགྲོ་གླེང་ཕྱི་ལོ་ ༡༩༨༧ ལོར། བཞུགས་སྒར་ཕོ་བྲང་དུ་ནུབ་ཕྱོགས་ཀྱི་ཚན་རིག་པ་ཁག་ཅིག་ལ་མཇལ་འཕྲད་གནང་བ་ནས་བཟུང་། ཕྱི་ལོ་ ༢༠༢༢ བར་སེམས་དང་སྲོག་གི་བགྲོ་གླེང་ཐེངས་ ༣༥ ཚུགས་ཡོད་པ་དང་། ལྟ་བ་རྟེན་འབྱུང་དང་། སྤྱོད་པ་འཚེ་བ་མེད་པ་གཉིས་སུ་བསྡུས་པའི་སངས་རྒྱས་པའི་ཆོས་ཀྱི་ལྟ་བ་རྟེན་འབྱུང་ནི་དེང་རབས་ཚན་རིག་དང་འབྲེལ་ཞིང་། སྤྱོད་པ་འཚེ་བ་མེད་པ་ནི་ཆོས་ལུགས་དང་འབྲེལ་བའི་གདམས་པ་དང་རྗེས་བསྟན་གྱི་གདམས་ངག་སྤྱི་དང་། ཡུལ་དུས་གདུལ་བྱའི་མོས་ཁམས་དང་འཚམས་པར་དེང་རབས་ཚན་རིག་གི་ཤེས་བྱ་དང་། གནའ་རབས་འཕགས་ཡུལ་ནཱ་ལེན་དྲའི་ལྟ་གྲུབ་སྦྲེལ་ནས་གནའ་དེང་འཛམ་གླིང་ཤར་ནུབ་ཀྱི་ལྟ་གྲུབ་དང་རིག་གཞུང་དབར་གཤིབ་བསྡུར་སྦྱངས་བཤད་མཛད་དེ། སྔོན་མེད་ཤིང་རྟའི་ལམ་སྲོལ་ལྟ་ཚན་རིག་ཤེས་བྱ་གཏིང་ཟབ་ལ་རྒྱ་ཆེ་བ་གསར་གཏོད་གནང།
དཔེར་ན། ཚན་རིག་གི་འཚོལ་ཞིབ་ཀྱི་གཞི་རྟེན་དུ་གྱུར་པའི་གཏན་ཚིགས་རིག་པ་དང་ནང་པའི་ཚད་མ་རིག་པའི་དབར་གྱི་མཐུན་ཆོས། ཆོས་རྣམས་བཏགས་དོན་བཙལ་བའི་ཚེ་རྙེད་དུ་མེད་པའི་ཟབ་མོ་དབུ་མའི་ལྟ་བ་དང། ལྷན་ཅིག་དམིགས་ངེས་ཀྱི་རྟགས་ཀྱིས་ཕྱི་དོན་མེད་པར་སྒྲུབ་པའི་སེམས་ཙམ་པའི་ལྟ་བ་གཉིས་དེང་རབས་ཚད་རྡུལ་དངོས་ཁམས་རིག་པའི་འདོད་ཚུལ་དང་སྦྱར་བ་ལྟ་བུ་དངོས་ཁམས་རིག་པ་དང་འབྲེལ་བའི་སྐོར། ཐོག་མཐའ་མེད་པའི་ནང་པའི་འཇིག་རྟེན་ལྟ་ཚུལ་དང་། འཇིག་རྟེན་འདིའི་ཐོག་མ་འབར་གས་ཆེན་མོ་འདོད་པའི་ཚན་རིག་གི་ལྟ་བའི་དབར་གྱི་འགལ་འདུ། འཇིག་རྟེན་ཆགས་རིམ་གྱི་སྐོར་ཌར་ཝིན་གྱི་འཕེལ་འགྱུར་རིག་པ་དང་སྦྱར་ནས་བཤད་པ་མཛད་པ་ལྟ་བུ་འཕེལ་འགྱུར་རིག་པ་དང་འབྲེལ་བའི་སྐོར། མེ་ཏོག་དང་རྩི་ཤིང་ལ་སོགས་པའི་སྐྱེ་དངོས་ལ་ཡུལ་ཚོར་བའི་ནུས་པ་ཡོད་མེད་དང་། དངོས་པོ་ཞིག་རྣམ་ཤེས་ཀྱི་རྟེན་དུ་འགྱུར་རུང་བའི་མཚམས་གང་ནས་འཛིན་དགོས་མིན་གྱི་དཔྱད་པ་ལྟ་བུ་སྐྱེ་དངོས་རིག་པ་དང་འབྲེལ་བའི་སྐོར། ལུས་ཀྱི་འཕྲོད་བསྟེན་དང་སེམས་ཀྱི་ཞི་བདེ་སྒྲུབ་ཐབས་སུ། ནང་པའི་སེམས་ཁམས་རིག་པའི་ནང་། ཚན་རིག་གི་སེམས་ཁམས་རིག་པར་བློ་སྐྱེད་འབུལ་རྒྱུ་ཡོད་སྐོར། དབང་རྩ་དང་། ཀླད་པ། སེམས་ཁམས་བཅས་ཀྱི་དབར་འབྲེལ་བ་ཡོད་པའི་བཤད་པ་ལྟ་བུ་ཀླད་ཁམས་རིག་པ་དང་འབྲེལ་བའི་སྐོར་སོགས་བགྲོ་གླེང་གི་བརྗོད་གཞི་གཙོ་བོར་བཞག་ཅིང་། སྒོས་སུ་ཞིབ་འཇུག་གི་གྲུབ་དོན་རྣམས་སྣོད་བཅུད་གཉིས་ཀར་གནོད་པའི་རྒྱུ་རུ་མི་འགྱུར་སླད་ཚན་རིག་པ་ཚོའི་ཞིབ་འཇུག་ལས་དོན་གང་ཞིག་ཡིན་ཡང་དེའི་གཞི་རྩ་རུ་སྙིང་རྗེའི་ཀུན་སློང་ཞིག་དགོས་གལ་ཆེ་བའི་འབོད་སྐུལ་གནང་བ་བཅས། ༸མགོན་པོ་གང་ཉིད་ཀྱིས་འདས་པའི་ལོ་ངོ་བཅུ་ཕྲག་གསུམ་ལྷག་བརྒལ་བའི་རིང་དེང་རབས་ཚན་རིག་པ་དང་བཀའ་བསྡུར་བགྲོ་གླེང་གནང་བའི་འབྲས་བུར། ཚན་རིག་དང་ཆོས་གཉིས་མཐུན་ཐབས་མེད་པའི་ལྟ་ཚུལ་དེ་ལའང་འགྱུར་བ་ཤུགས་ཆེན་པོ་འགྲོ་བཞིན་ཡོད་པར་མ་ཟད། རྩོད་མེད་སྙན་གྲགས་ཅན་གྱི་མི་སྒེར་དང་ཚན་རིག་པའི་བསྟི་གནས་ཁག་མང་པོར་ཚན་རིག་ཞིབ་འཇུག་གི་ཁྱབ་ཁོངས་རྒྱ་ཇེ་ཆེ་དང་གཏིང་ཇེ་ཟབ་ཏུ་འགྲོ་བཞིན་ཡོད།
དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་ནང་། ༸རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་མཆོག་ནི་རྒྱལ་བློན་པཎ་གྲུབ་སོགས་ཀྱི་སྤྲུལ་སྒྱུར་བསམ་གྱིས་མི་ཁྱབ་པས་མཐའ་ཡས་པའི་གདུལ་བྱ་རྣམས་མངོན་མཐོ་དང་ངེས་ལེགས་ཀྱི་ལམ་བཟང་པོར་བཀྲི་བར་མཛད་པའི་འཕྲིན་ལས་ཀྱི་འཇུག་པ་ས་གསུམ་ཀུན་ཏུ་ཁྱབ་ཅིང་བརྗོད་ཀྱིས་མི་ལངས་ཤིང་། ༸རྒྱལ་མཆོག་ལྔ་པ་ཆེན་པོས་བོད་ལྗོངས་ལུགས་ཟུང་གསེར་གྱི་འཁོར་ལོ་བདག་གིར་བཞེས་ཏེ་གངས་ལྗོངས་ཆབ་སྲིད་ཀྱི་གདུགས་དཀར་ཡུག་གཅིག་གི་གྲིབ་བསིལ་འོག་སྐྱེ་འགྲོ་མཐའ་དག་བདེ་བར་བཀོད། ལྷག་པར་༸རྒྱལ་མཆོག་བཅུ་བཞི་པ་ཆེན་པོ་གང་ཉིད་སྙིགས་དུས་སྐྱེ་འགྲོ་སྤྱི་དང་། བྱེ་བྲག་གངས་ཅན་ཆོས་ལྡན་ཞིང་དུ་དུས་ཚོད་གཉན་འཕྲང་ཆེ་བའི་སྐབས་འདིར་སྐུ་ཡི་བཀོད་པ་བཟུང་སྟེ། མཚན་དཔེའི་དཀྱིལ་འཁོར་ཡོངས་སུ་རྫོགས་ཤིང་ཐོས་བསམ་སྒོམ་གསུམ་དང་། འཆད་རྩོད་རྩོམ་གསུམ་སོགས་ཐུན་མོང་དང་ཐུན་མོང་མ་ཡིན་པའི་ཤེས་བྱའི་གནས་མཐའ་དག་ལ་མངའ་དབང་འབྱོར་ཞིང་ངེས་པ་དོན་གྱི་མཁས་པའི་ཁྱུ་མཆོག་ཏུ་གྱུར་ཅིང་སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་རྒྱུད་ལ་སྐྱེས་ཤིང་གདུལ་བྱ་རྣམས་ལ་ཟབ་ཆོས་གསུང་གི་བདུད་རྩི་ཟད་མེད་དུ་སྟེར་བ་ནི་དེང་གི་རང་རེའི་སྤྱི་ཚོགས་ཙམ་མ་ཟད་གླིང་ཆེན་མང་པོའི་སྐྱེ་འགྲོ་རྣམས་ཀྱི་བསོད་ནམས་ཀྱི་བགོ་སྐལ་ཏུ་གྱུར་ཡོད། ཐོག་མར་བཙན་བྱོལ་དུ་འབྱོར་སྐབས་བོད་དོན་བདེན་མཐའ་གསལ་བར་ཉེ་བར་མཁོ་བའི་བོད་ཕྲུག་ན་གཞོན་རྣམས་ལ་མ་འོངས་བོད་ཀྱི་བདག་པོར་དགོངས་བཞེས་ཀྱིས་བོད་ཕྲུག་ཁེ་གཙང་གི་གཏན་ཉིན་སློབ་གྲྭ་ཁག་གསར་འཛུགས་དང་གཞན་མཐོ་སློབ་ཁག་ནས་སྦྱང་འབྲས་ཐོན་ཏེ་ཤེས་ཡོན་ཅན་གྱི་བཙན་བྱོལ་སྤྱི་ཚོགས་ཤིག་ཆགས་པ་མ་ཟད། ད་སྐབས་བོད་མིའི་སྒྲིག་འཛུགས་གཙོ་བོར་གྱུར་བའི་སློབ་གྲྭ་ཁག་དང་། རིག་གཞུང་བསྟི་གནས་ཁང་ཁག སྨན་ཁང་ཁག གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་ཁག་སོགས་ཀྱི་ནང་ཞབས་ཕྱི་ཞུ་མཁན་གྱི་བརྒྱ་ཆ་མང་བ་ནི། ༸རྒྱལ་བའི་ཐུགས་རྗེའི་བཀའ་དྲིན་གྱི་གྲིབ་བསིལ་འོག་བཙན་བྱོལ་དུ་འཚར་ལོངས་དང་ཤེས་ཡོན་གྱི་གོ་སྐབས་ཐོབ་སྟེ་སློབ་མཐར་ཕྱིན་པ་ཤ་སྟག་ཡིན་པ་དང་། ད་ཆ་ཁྱད་ལས་ཤེས་ཡོན་གྱིས་ཕྱུག་པའི་བཙན་བྱོལ་སྤྱི་ཚོགས་སུ་གྱུར་ཏེ་སྤྱི་སྒེར་བྱེད་སྒོ་ཡོངས་རྫོགས་བོད་མི་རང་ཉིད་ཀྱི་མི་སྣས་འགན་ཁུར་སྣེ་ཁྲིད་བྱེད་བཞིན་པ་དེ་ནི་མི་རིགས་ཀྱི་རྒྱལ་ཁ་ཆེ་ཤོས་ཤིག་ཡིན་པ་དང་། དེ་ཡང་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཉག་ཅིག་ལ་བརྟེན་ནས་བྱུང་བ་ཡིན་པ་ནམ་ཡང་བརྗེད་ཐབས་མེད་པར་གསུངས་སོང་།
དེ་བཞིན་དེ་རིང་ཉིན་རྒྱབ་རྡ་ས་ཁུལ་གྱི་ཚོགས་པ་སྐྱིད་སྡུག་ཁག་མང་པོ་ཞིག་གིས་གཞས་སྣ་འཁྲབ་སྟོན་གནང་་རྒྱུ་ཡིན་འདུག
གསར་འགོད་པ། བསོད་ནམས་ཕུན་ཚོགས།
