ཕྱི་ལོ་༢༠༢༥ ལོར་རྒྱ་གཞུང་གིས་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་བཏང་འདུག

རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་(Human Rights Watch) བརྗོད་པ་ལྟར་ན།ཕྱི་ལོ་༢༠༢༥ ལོར་རྒྱ་ནག་གིས་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་བཏང་ཡོད་པ་དང་། ལྷག་པར་དུ་བོད་དང་། ཧོང་ཀོང་། ཤར་ཏུར་ཀི་སི་ཐན་སོགས་ཀྱི་ནང་རྒྱ་གཞུང་གིས་དམ་དྲག་དང་བཙོན་འཇུག་བྱེད་ཤུགས་ཆེ་རུ་ཕྱིན་ཡོད་པར་བརྗོད་འདུག

ཕྱི་ལོ་༢༠༢༦ ཟླ་༢ ཚེས་༩ ཉིན་རྒྱ་གར་གྱི་གསར་ཁང་(INDIAN FLASH) ཞེས་པས་གནས་ཚུལ་སྤེལ་དོན་ལ། རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་(Human Rights Watch)ཕྱི་ལོ་༢༠༢༥ ལོའི་རྒྱ་ནག་ནང་གི་འགྲོ་བ་མིའི་ཐོབ་ཐང་སྐོར་གྱི་ལོ་འཁོར་སྙན་ཐོ་ཞིག་བཏོན་ཡོད་པ་དང་། སྙན་ཐོ་དེའི་ནང་། ཕྱི་ལོ་༢༠༢༥ ལོའི་ནང་རྒྱ་ནག་གཞུང་གིས་མི་མང་ཐོག་དྲག་གནོན་ཤུགས་ཆེ་རུ་བཏང་ཡོད་པ་མ་ཟད། སྲིད་འཛིན་ཞི་ཅིན་ཕིང་གིས་གཞུང་གི་ལས་བྱེད་རྣམས་ཀྱི་བསམ་བློའི་ལྟ་བ་གཅིག་གྱུར་དགོས་པ་དང་། ཞི་ཅིན་ཕིང་རང་ཉིད་དང་རྒྱ་ནག་དམར་ཤོག་ཚོགས་པར་བློ་དཀར་དགོས་པའི་སྐུལ་འདེད་ཤུགས་ཆེ་བཏང་ཡོད་པ་བཀོད་འདུག དེའི་རྐྱེན་གྱིས་བོད་མི་དང་། ཡུ་གུར་བ། གཞུང་འབྲེལ་མ་ཡིན་པའི་ཆོས་ཚོགས་ཀྱི་ཚོགས་མི་རྣམས་ལ་ལོ་བཅུ་ཕྲག་ཁ་ཤས་ནང་བྱུང་མ་མྱོང་བའི་གཞི་རྩའི་འགྲོ་བ་མིའི་ཐོབ་ཐང་ལ་དྲག་གནོན་ཕོག་བཞིན་ཡོད་པ་བརྗོད། ལྟ་ཞིབ་ཚོགས་པའི་འབྲེལ་ཡོད་མི་སྣ་(Maya Wang)ཡིས། ཞི་ཅིན་ཕིང་གི་དབང་འོག་ཏུ་རྒྱ་ནག་གཞུང་གིས་དྲག་གནོན་རྒྱ་བསྐྱེད་བཏང་ནས་འགྲོ་བ་མིའི་ཐོབ་ཐང་གི་གནས་སྟངས་ཧ་ཅང་སྡུག་པོ་བཟོས་ཡོད་ཅེས་བཤད་འདུག

                  ཧོང་ཀོང་ནང་དྲག་གནོན་ཤུགས་ཆེ་རུ་ཕྱིན་པ།
ཧོང་ཀོང་ནང་རྒྱལ་ཁབ་བདེ་འཇགས་ཀྱི་ཁྲིམས་ཡིག་ཅེས་པ་ལག་བསྟར་བྱས་ནས་ད་ཆར་ལོ་ལྔ་འཁོར་བའི་མཚམས་སུ། རྒྱ་གཞུང་གིས་དྲག་གནོན་བྱེད་ཤུགས་ཆེ་རུ་བཏང་ཡོད་པ་བརྗོད།  དཔེར་ན། ཉེ་ཆར་སྤྱི་ཚོགས་དམངས་གཙོ་མཐུན་ཚོགས་(League of Social Democrats) ཀྱིས་ལས་འགུལ་སྤེལ་མཚམས་བཞག་ཡོད་པ་དང་། དེ་ནི་འཛམ་གླིང་གི་དཔལ་འབྱོར་ལྟེ་གནས་དེའི་ནང་གི་དམངས་གཙོ་དོན་གཉེར་བའི་ཚོགས་པ་མཐའ་མ་དེ་ཡིན་པ་བརྗོད་འདུག

དེ་མ་ཟད། རྒྱ་ནག་གཞུང་གིས་ཐེངས་དང་པོར་ཕྱི་རྒྱལ་དུ་ཡོད་པའི་རྒྱ་གཞུང་ལ་སྐྱོན་བརྗོད་བྱེད་མཁན་ཞིག་གི་ནང་མི་ལའང་རྒྱལ་ཁབ་བདེ་འཇགས་ཀྱི་ཁྲིམས་ཡིག་འོག་ནས་ཁྲིམས་གཏུག་བྱས་ཡོད་འདུག དམངས་གཙོའི་འགོ་ཁྲིད་མང་པོ་ཞིག་ད་ལྟ་བཙོན་ཁང་དུ་ཡོད་ཅིང་། དེའི་ནང་ཀུ་ཤུ་ཉིན་རེ་གསར་ཤོག་(Apple Daily) གསར་འཛུགས་གནང་མཁན་ལི་ཀྲི་དབྱིང་(Jimmy Lai) ཀྱང་ཡོད། རྒྱལ་སྤྱིའི་གསར་ཁང་ཁག་གི་གནས་ཚུལ་ལྟར་ན། ཁོང་ལ་དེ་རིང་རྒྱ་ནག་གིས་ལོ་ངོ་༢༠ ཡི་བཙོན་འཇུག་ཁྲིམས་ཐག་བཅད་ཡོད་པ་རྗོད་བཞིན་འདུག

             བོད་དང་ཤར་ཏུར་ཀི་སི་ཐན་གྱི་གྲངས་ཉུང་མི་རིགས་ལ་དམིགས་པ།
ཞི་ཅིན་ཕིང་གིས་ཕྱི་ལོ་༢༠༢༥ ལོའི་ལོ་མཇུག་ཏུ་བོད་དང་ཤར་ཏུར་ཀི་སི་ཐན་ལ་ལྟ་སྐོར་དུ་ཕྱིན་ནས། གནད་འགག་ཅན་གྱི་ས་གནས་དེ་དག་ལ་རྒྱ་ནག་གཞུང་གིས་དབང་ཤུགས་ངོམ་ཆེད་དམ་དྲག་ཤུགས་ཆེན་པོ་བྱས་ཡོད་པ་བརྗོད་འདུག ལྷག་པར་དུ་རྒྱ་ནག་གཞུང་གིས་བོད་ནང་༧གོང་ས་མཆོག་དགུང་གྲངས་༩༠ ལ་ཕེབས་པའི་སྐུའི་འཁྲུངས་སྐར་སྲུང་བརྩི་བྱེད་པར་བཀག་སྡོམ་བྱས་པ་དང་། ཡུ་གུར་བ་སྟོང་ཕྲག་མང་པོ་ད་དུང་ཡང་དྲང་བདེན་མ་ཡིན་པའི་བཙོན་འོག་ཏུ་ཡོད་ཅེས་བཀོད་འདུག

                        ཆོས་ལུགས་རྒྱ་ནག་ཅན་དུ་སྒྱུར་བ།
ཆོས་ལུགས་རྒྱ་ནག་ཅན་དུ་སྒྱུར་བའི་ལས་འགུལ་ཞིག་སྤེལ་བཞིན་ཡོད་པའི་ཁྲོད། སྲོལ་རྒྱུན་གྱི་ཆོས་ལུགས་དད་མོས་ཀྱི་ཚབ་ཏུ་གཞུང་ཕྱོགས་དམར་ཤོག་ཚོགས་པའི་བསམ་བློའི་ལྟ་བ་ཁྱབ་སྤེལ་བྱེད་དུ་འཇུག་གིན་ཡོད་པ་དང་། ཉེ་ཆར་རྒྱ་ནག་གཞུང་གིས་ལིན་ཧྥེན་གསེར་གྱི་སྒྲོན་མེ་ཆོས་ཚོགས་(Linfen Golden Lampstand Church)ཀྱི་མི་གྲངས་བཅུ་ཕྲག་ལྷག་ལ་གཞན་གྱི་རྒྱུ་ནོར་བསླུ་བྲིད་བྱས་པའི་ཉེས་མིང་འོག་ཁྲིམས་ཐག་བཅད་པ་ནི། གོ་རིམ་ལྡན་པའི་རྡུང་རྡེག་གི་ལས་འགུལ་དེའི་ཆ་ཤས་ཤིག་ཡིན་པ་བརྗོད།

དེ་བཞིན་ཆོས་ཚོགས་(Zion Church) ཀྱི་ཆོས་དཔོན་ཚུད་པའི་འབྲེལ་ཡོད་མི་སྣ་སུམ་ཅུ་སྐོར་ཞིག་གིས་གཞུང་འཛུགས་ཆོས་ཚོགས་ནང་མཉམ་ཞུགས་མ་བྱས་པར་ངོ་རྒོལ་བྱས་རྐྱེན་ཉེན་རྟོག་པས་འཛིན་བཟུང་བྱས་ཡོད་པ་དང་། གང་བྱུང་དུ་བཙོན་འཇུག་བྱེད་པའི་བྱ་སྤྱོད་དེ་དག་གིས། དམར་ཤོག་ཚོགས་པའི་འགོ་ཁྲིད་ལ་མ་ལྟོས་པར་རང་དབང་དུ་གནས་པའི་ཆོས་ལུགས་སྒྲིག་འཛུགས་གང་འདྲ་ཞིག་ཡིན་རུང་། དམར་ཤོག་ཚོགས་པའི་བཀའ་ལ་མ་བརྩི་ཚེ་དཀའ་ངལ་ཆེན་པོ་འཕྲད་ཀྱི་ཡོད་པའི་མཚོན་རྟགས་ཤིག་ཡིན་པ་བརྗོད་འདུག

    རྒྱལ་མཚམས་ལས་བརྒལ་བའི་དྲག་གནོན་དང་སྐྱོན་བརྗོད་བྱེད་མཁན་གྱི་སྨྲ་བརྗོད་རང་དབང་བཀག་སྡོམ།

པེ་ཅིང་གཞུང་གིས་ཕྱི་རྒྱལ་ལ་ཡོད་པའི་རྒྱ་རིགས་ཁྲོད་དམར་ཤོག་ཚོགས་པར་སྐྱོན་བརྗོད་བྱེད་མཁན་དག་གི་ཁ་འགོག་ཐབས་སུ། རྒྱ་ནག་ནང་ཡོད་པའི་ཁོང་ཚོའི་ནང་མི་ཚོར་བསུན་གཙེར་བཟོ་བ་དང་། ཕྱིར་རྒྱ་ནག་ནང་ལོག་མཁན་ཚོ་བཙོན་འཇུག་བྱེད་པ་སོགས་ཀྱི་ལས་འགུལ་ཤུགས་ཆེ་རུ་བཏང་ཡོད་པ་བརྗོད། ཉེ་བའི་དཔེ་མཚོན་གཅིག་ནི། ལས་འགུལ་བ་དང་བོད་དོན་རྒྱབ་སྐྱོར་བ་རྒྱ་རིགས་སློབ་མ་(Tara Zhang Yadi) ཕྱིར་རྒྱ་ནག་ལ་ལོག་སྐབས་འཛིན་བཟུང་བྱས་པ་དང་། ནིའུ་ཡོག་ཏུ་འཚོགས་པའི་ (IndieChina) གློག་བརྙན་དུས་སྟོན་གྱི་གློག་བརྙན་བཟོ་སྐྲུན་པ་ཚོར་འཇིགས་སྐུལ་བྱས་པ་སོགས་བྱུང་ཡོད་པ་བརྗོད་འདུག

  ཕྱི་ལོ་༢༠༢༦ ལོའི་(the World Report)འཛམ་གླིང་སྙན་ཐོའི་ནང་དོན་ཅི་ཞིག་རེད།

ཤོག་གྲངས་༥༢༩ ཡོད་པའི་སྙན་ཐོ་དེའི་ནང་། རྒྱལ་ཁབ་༡༠༠ ལྷག་གི་འགྲོ་བ་མིའི་ཐོབ་ཐང་གི་ལག་བསྟར་གནས་སྟངས་ལ་བསྐྱར་ཞིབ་བྱས་ཡོད་པ་དང་། དེ་ནི་ལོ་རེའི་འཛམ་གླིང་ཡོངས་ཀྱི་བསྐྱར་ཞིབ་སྙན་ཐོ་འདོན་ཐེངས་༣༦ པ་དེ་ཡིན་པ་བརྗོད་འདུག

གསར་འགོད་པ། བསོད་ནམས་ཕུན་ཚོགས།