ནོ་སྦེལ་ཞི་བདེའི་གཟེངས་རྟགས་དུས་དྲན།
ཞོགས་པ་ཆུ་ཚོད་༩ པའི་ཐོག་གཞུང་འབྲེལ་མཛད་སྒོ་དབུ་འཛུགས་གནང་བ་དང། སྐབས་དེར་བོད་གཞུང་ཟློས་གར་ཚོགས་པའི་རྔ་རོལ་དང་བཅས་བོད་རྒྱལ་ཁབ་ཆེན་པོའི་རྒྱལ་གླུ་འབུལ་བཞིན་བཀའ་བློན་ཁྲི་ཚབ་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས་རྒྱལ་དར་མཁའ་དབྱིངས་སུ་སྒྲེང་འཛུགས་གནང་བ་དང། ཟློ་གར་ཚོགས་པའི་ནོ་སྦེལ་ཞི་བདེའི་གཟེངས་རྟགས་ཀྱི་བསྟོད་དབྱངས་མཉམ་གཞས་ཕུལ་ཡོད་པ་རེད།
དེ་རྗེས་བཀའ་བློན་ཁྲི་ཚབ་ཚེ་རིང་ཕུན་ཚོགས་མཆོག་གིས་བཀའ་ཤག་གི་གཞུང་འབྲེལ་གསུང་བཤད་སྒྲོགས་སྦྱང་གནང་བ་དང། དེའི་ནང་“དེ་རིང་གི་ཉིན་མོ་ནི་འཛམ་གླིང་མཉམ་འབྲེལ་རྒྱལ་ཚོགས་ཀྱིས་འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་སྤེལ་ནས་ལོ་ངོ་ ༦༣ ཉེ་བར་འདས་ཟིན་ནའང༌། ད་དུང་འཇིག་རྟེན་འདིར་འགྲོ་བ་མིའི་ཐོབ་ཐང་ཇི་བཞིན་སྲུང་སྐྱོབ་མི་ཐུབ་པ་མ་ཟད། དམག་དང༌། དཔལ་འབྱོར་གྱི་སྟོབས་ཤུགས་ཆེ་ཆུང་གི་དབར་འབུ་ཆེས་ཆུང་ཟོས་ལྟར་གནས་ཚུལ་ཇེ་ཞན་དུ་འགྲོ་བཞིན་པ་དང༌། ལྷག་པར་འགྲོ་བ་མིའི་ཐོབ་ཐང་གི་བརྡལ་བཤིག་ཆེ་ཤོས་ཤིག་ནི་སྲིད་དོན་དང་དཔལ་འབྱོར་གྱི་གོ་ལ་གཅིག་སྒྱུར་གྱི་ལམ་ལུགས་འོག་མི་རིགས་དང་སྤྱི་ཚོགས་སོ་སོའི་རང་རང་གི་ཐུན་མོང་མ་ཡིན་པའི་ཆོས་དང༌། རིག་གཞུང༌། ལེགས་བྱང༌། ཡུལ་གོམས་གཤིས་ལུགས། སྐད་ཡིག་དང་བཅས་པ་རིམ་བཞིན་རང་ཡལ་དུ་འགྲོ་བའི་གནས་ཚུལ་འདི་ནི་མིའི་ཐོབ་ཐང་གི་བརྡལ་བཤིག་ཆེ་ཤོས་ཤིག་ཡིན་རུང༌། དེ་དག་ལ་གདོང་ལེན་ལྟ་ཞོག ངོས་འཛིན་ཙམ་ཡང་བྱེད་དཀའ་བའི་གནས་ཚུལ་འདི་ནི་བློ་འཚབ་སྐྱེ་གཞི་ཞིག་ཡིན་”ཞེས་སོགས་འཁོད་ཡོད་པ་རེད།
བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་སྤྱི་འཐུས་ཀྱི་གསུང་བཤད་སྒྲོགས་སྦྱང་གནང་དང། དེའི་ནང་དུ་“དུང་བོད་མི་དམར་གསོད་དང། འཛིན་བཟུང་བཙོན་འཇུག་གིས་སྡུག་སྦྱོང་མནར་གཅོད་བཏང་དང་གཏོང་བཞིན་པར་ངོ་རྒོལ་དང། དེ་དག་འཕྲལ་དུ་མཚམས་འཇོག་དགོས་པ། རྒྱལ་སྤྱིའི་ཁྱིན་གྱི་བོད་དོན་རྒྱབ་སྐྱོར་བ་ཡོངས་ནས་བོད་ནང་ཛ་དྲག་གི་གནས་སྟངས་ལ་བེན་རྒྱབ་དཔུང་རོགས་ངེས་གནང་ཡོང་བའི་འབོད་སྐུལ་ཞུ་རྒྱུ་དང། 
རྒྱ་ནག་གཞུང་ནས་ཀྱང་ལུགས་མཐུན་ལག་བསྟར་ངེས་པར་དགོས་པའི་དགོས་འདུན་ཤུགས་ཆེ་བྱ་བཞིན་ཡོད་”ཅེས་སོགས་འཁོད་ཡོད་པ་རེད།
དེ་བཞིན་སྐབས་དེར་བཙན་བྱོལ་བོད་གཞུང་གི་སྲི་ཞུ་ལས་བྱེད་པ་བགྲེས་ཡོལ་དུ་ཕེབས་པ་རྣམས་དང། བོད་གཞུང་འཕྲོད་སྟེན་ལས་ཁུངས་ཀྱི་ལས་བྱེད་ཞབས་ལོ་༢༥ འཁོར་བ་བཅས་ལ་བཀའ་བློན་ཁྲི་ཚབ་ཚེ་རིང་ཕུན་ཚོགས་མཆོག་གིས་རྗེས་དྲན་ལེགས་སྐྱེས་དང། བྱ་དགའ་གསོལ་བསྩལ་གནང་ཡོད་པ་རེད། ཉིན་དེར་རྒྱ་ནག་པེ་ཅིང་དུ་གནས་སྡོད་རྩོམ་པ་པོ་འོད་ཟེར་ལགས་ཀྱིས་བརྩམས་པའི་རིག་གནས་གསར་བརྗེའི་དྲན་ཐོ་ཞེས་པའི་དཔེ་དེབ་དང། བོད་མིའི་ཚོང་ལས་བདེ་ཚོགས་ནས་གསར་བསྐྲུན་བྱས་པའི་རྒྱ་གར་ཚོང་འབྲེལ་བྱེད་ཐབས་ཞེས་པའི་དེཔ་དེབ། སྒྲོན་མེ་ཆེད་རྩོམ་འགྲན་སྡུར་ཞེས་པའི་དཔེ་དེབ་ཤེས་རྟོགས་དང་ལག་ལེན་ཞེས་པ་བཅས་བཀའ་བློན་ཁྲི་ཚབ་མཆོག་གིས་མཛད་སྒོའི་ཐོག་དབུ་འབྱེད་གནང་བ་དང། སྒྲོན་མེ་ཆེད་འགྲན་སྡུར་ཁྲོད་ཀྱི་ཨང་རིམ་དང་པོ་དང་གཉིས་པ་གསུམ་པ་བཅས་ལ་བྱ་དགའ་གནང་ཡོད་པ་རེད།
དེ་རྗེས་བོད་གཞུང་ཟློས་གར་དང། གངས་སྐྱིད་ཉེ་འཁོར་གྱི་སློབ་གྲྭ་ཁག བོད་གཞུང་གི་ལས་བྱེད་ཁག་ཅིག ཐང་སྟོང་གླུ་གར་ཚོགས་པ་བཅས་ནས་རེ་རེ་བཞིན་གཞས་སྣ་གཟིགས་འབུལ་ཞུས་པ་དང་གཞུང་འབྲེལ་མཛད་སྒོ་གྲོལ་ཡོད་པ་རེད།
ཕྱི་དྲོ་དེར་ཚོགས་པ་སྐྱིད་སྡུག་ཁག་དང། སློབ་གྲྭ་ཁག་སོགས་ནས་གཞུས་སྣ་གཟིགས་འབུལ་ཞུས་ཡོད་པ་རེད།།
