རྒྱ་གར་ཤར་ཕྱོགས་སུ་མཚོ་རླུང་གི་གནོད་འཚེ་བྱུང་བར་༧གོང་ས་མཆོག་གིས་ཐུགས་གསོའི་གསུང་འཕྲིན་བསྩལ།
རྒྱ་གར་ཤར་བརྒྱུད་དུ་མཚོ་རླུང་ཨམ་ཧྥན་(cyclone amphan)གྱིས་མི་མང་གི་ཚེ་སྲོག་དང་།དངོས་ཟོག་ལ་གནོད་སྐྱོན་ཆེན་པོ་ཐེབས་པར། ༧གོང་ས་མཆོག་གིས་ཐུགས་གསོའི་གསུང་འཕྲིན་བསྩལ་འདུག
ཕྱི་ལོ་ ༢༠༢༠ ཟླ་ ༥ ཚེས་༢༡ཉིན་གྱི་ཞོགས་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ནུབ་བཾགཱ་ལའི་མངའ་སྡེའི་བློན་ཆེན་མམ་ཏཱ་བ་ནར་ཇཱི་དང་། ཨོ་ཌི་ཤཱའི་མངའ་སྡེའི་བློན་ཆེན་ན་ཝཱིན་པཋ་ནཱ་ཡཀ་གཉིས་ལ་གསུང་འཕྲིན་རེ་སྩལ་ཏེ། མངའ་སྡེ་དེ་གཉིས་ཀྱི་རྫོང་འགའ་ཞིག་ནང་མཚོ་རླུང་གི་འཇིགས་པས་སྐྱེ་འགྲོར་འཆི་སྐྱོན་དང་། སྡོད་ཁང་མང་པོར་གཏོར་བཤིག་ཐེབས་པ་མ་ཟད། མི་ཧ་ཅང་མང་པོ་ལ་དཀའ་སྡུག་ཆེན་པོ་འཕྲད་པ་ལ་ཐུགས་གསོ་མཛད་ཡོད།
གསུང་འཕྲིན་གཉིས་ཀྱི་ནང་། “རང་བྱུང་གི་འཇིགས་པ་འདི་མ་ཡོང་སྔོན་ནས་གྲ་སྒྲིག་འཐུས་ཚང་གནང་བ་དང་། གོད་ཆག་བྱུང་བ་རྣམས་ལ་སྐྱོབ་གསོའི་མཐུན་རྐྱེན་སྦྱོར་ཐབས་ལ་འབད་རྩོལ་གནང་བཞིན་པ་ལ་བསྔགས་བརྗོད་ཡོད”ཅེས་དང་།
“ཨོ་ཌི་ཤཱ་དང་། ནུབ་བཾགཱ་ལའི་མི་མང་ལ་གདུང་སེམས་མཉམ་བསྐྱེད་མཚོན་བྱེད་དུ་ཏཱ་ལའི་བླ་མའི་དགེ་རྩ་ནས་ངལ་སེལ་ཆེད་དུ་ཞལ་འདེབས་འབུལ་གྱི་ཡིན།” “ཆུ་རླུང་གི་འཇིགས་པས་གཉེན་ཉེ་དུ་འཆི་སྐྱོན་བྱུང་བའི་ཁྱིམ་ཚང་རྣམས་དང་། གཞན་ཡང་གོད་ཆག་བྱུང་བ་ཚང་མ་ལ་མྱ་ངན་ཐུགས་གསོ་ཡོད།”
མམ་ཏཱ་བ་ནར་ཇཱི་ལ། “བཙན་བྱོལ་བོད་པ་རྣམས་མི་ལོ་ ༦༡ ཙམ་གྱི་གནས་བཅའ་སའི་རྒྱ་གར་གྱི་ཡུལ་འདི་ནི་བོད་པས་གནའ་ནས་གནས་རྩ་ཆེན་དུ་བརྩི་ལ། ལྷག་པར་བཾགཱ་ལ་ནི་དུས་རབས་བརྒྱད་པའི་ནང་བོད་ཀྱི་དགོན་པ་དང་པོ་བསམ་ཡས་ཕྱག་འདེབས་པ་པོ་ཚད་མ་པ་དང་ལྟ་གྲུབ་སྨྲ་བ་མཁན་ཆེན་ཞི་བ་འཚོ་དང་། དུས་རབས་བཅུ་གཅིག་པའི་ནང་བོད་ལ་བསྟན་པ་སླར་གསོ་མཛད་མཁན་ཨ་ཏི་ཤ་དཱི་པཾ་ཀ་ར་གཉིས་ཀའི་འཁྲུངས་ཡུལ་ཡིན་པས། བོད་པའི་སེམས་ནང་བཾགཱ་ལར་དམིགས་བསལ་གྱིས་བརྩི་བཀུར་ཆེན་པོ་ཡོད”ཅེས་ཆེད་དུ་བཀའ་སྩལ་འདུག །
གསར་འགོད་པ་དཀོན་མཆོག་རབ་བརྟན།