Opinions

དཀོན་མཆོག་བསྟན་འཛིན།  བལ་ཡུལ།
རྒྱ་ནག་གིས་བོད་རང་སྐྱོང་ལྗོངས་སུ་བོད་ཀྱི་བྲན་གཡོག་མང་པོར་བཅིངས་འགྲོལ་ཐོབ་པའི་དུས་དྲན་སྲུང་བརྩི་གྲ་རྒྱས་ཤིག་བྱ་རྒྱུའི་སྔོན་འགྲོའི་འཆར་གཞི་ཁག་གོ་སྒྲིག་གི་ཡོ་ལངས་ཆེན་པོ་ཞིག་མི་དམངས་ཁྲོད་ལག་བསྟར་བྱེད་བཞིན་འདུག་ལ། དེ་ཡང་གྲོང་གསེབ་ཞིང་པ་རྒས་འཁོགས་རེ་བཟུང་དང་འབྲོག་པ་རྒས་འཁོགས་རེ་བཟུང་ལ་དངུལ་དངོས་ཕྲན་བུ་སྤྲད་དེ་གུང་ཁྲན་ཏང་བཀའ་དྲིན་ཆེ་ཚུལ་བརྗོད་པ་ཁག་བརྙན་འཕྲིན་བརྒྱུད་ཡང་ཡང་བསྐྱར་སྟོན་བྱས་པ་དང༌། བོད་ཀྱི་མདོ་སྟོད་སྨད་གང་ས་ནས་གནས་མཇལ་ཆེད་ལྷ་སར་ཡོང་བ་ཁག་དང༌། ཚོང་ཙག་ཙིག་བརྒྱབ་ནས་འཚོ་བ་སྐྱེལ་མཁན་བོད་མི་ཕལ་ཆེར་འཇུ་བཟུང་གིས་དམ་དྲག་ཆེན་པོ་བྱས་ཤིང་ནག་ཉེས་ཆེ་བའི་ཁྲིམས་འགལ་ཇི་ལྟར་བྱས་པ་ཡིན་ན་སྙམ་སྟེ་རང་གི་རང་ལ་དྲི་བ་ཤིག་རང་བཞིན་གྱིས་ཡོང་གི་ཡོད།

མོན་པ་བསྟན་འཛིན་རིག་འཛིན། འབྲས་སྒོ་མང༌།

ངས་རང་གི་མི་རིགས་ཀྱི་ལ་རྒྱ་བསམ་ནས་ཁ་ཁུ་སིམ་པའི་ངའི་མི་རིགས་ཀྱི་ལས་དབང་ལ་བསམ་ཤེས་པ་ནས་ད་བར་བསམ་གཞིག་མང་པོ་བྱེད་མྱོང༌། དེའི་ཆེད་དུས་ཚོད་བཏང་བའང་ཉུང་ཉུང་མིན། ངའི་མི་རིགས་ནི་གདོད་མ་ནས་ལས་ལ་བརྩོན་ཞིང༌། ལས་འབྲས་ལ་ཡིད་ཆེས་བརྟན་པོ་བྱེད། སྲོག་ཆགས་འབུ་སྲིན་ཚུན་ལ་བྱམས་སྙིང་རྗེ་ལྷན་སྐྱེས་སུ་གྲུབ། སློབ་དཔོན་ཐོན་མིས་དཀའ་བ་ཁྱད་བསད་ཀྱིས་སྲོལ་བཏོད་པའི་ཐེག་པ་ཆེ་ཆུང་སྔགས་དང་བཅས་པ་གསལ་བར་སྟོན་ནུས་པའི་ཡི་གེ་དེ་སྐད་ཡིན་ལ། ངའི་མི་རིགས་ཀྱི་སྲོག་རྩའང་ཡིན། རྒན་པ་དང་ཡོན་ཏན་ཅན་ལ་གོང་བཀུར་དང༌། གཞོན་པ་དང་དམན་པར་བྱམས་ཀྱིས་སྐྱོང་བའི་མི་ཆོས་ཀྱི་ཡ་རབས་སྲོལ་བཟང་ལྡན། ངའི་མི་རིགས་ཀྱི་ཡབ་མེས་རྣམས་འཕགས་མཆོག་སྤྱན་རས་གཟིགས་ཀྱི་གདུལ་ཞིང་ལས་མཆེད་ཅིང༌། མ་ཧ་ཙི་ནའི་ཁམས་ཀྱི་གོང་མ་རིམ་བྱོན་གོ་ཐོས་མེད་ལ། འཕགས་ཡུལ་གྱི་མ་ཧ་ར་ཛ་རྣམས་ཀྱང་བརྒྱུད་མེད།

རྒྱལ་མཚན་དར་རྒྱས།   རྫོང་སར།
ཀྱེ་གངས་ཕྲུག་རྣམས། ལོ་རྒྱུས་ཀྱི་དཀྱོག་མཚམས་འདིར་ང་ཚོ་ནི་མི་རིགས་ཤིག་འཆི་གསོན་ལ་ཐུག་པའི་བར་བརྒལ་གྱི་དུས་རབས་པ་ཞིག་སྟེ། ཚེ་སྲོག་གི་རྒྱུ་གྲོན་བཏང་ཞིང་ཁྲག་དང་མིག་ཆུས་མི་རིགས་ཀྱི་མདུན་ལམ་སྐྲུན་བཞིན་པ་ཡིན། ལྷག་པར་དུ་ཉིས་སྟོང་བརྒྱད་ལོར་ང་ཚོ་གསོན་བཞིན་པ་ཚོའི་ཕ་མ་དང་བུ་ཕྲུག བཟའ་ཟླ་དང་གཉེན་ཉེ། གྲོགས་པོ་དང་གྲོགས་མོ་ཇི་ཙམ་ཞིག་གི་ཚེ་སྲོག ང་ཚོ་སྒང་པ་གངས་ཅན་པའི་མདུན་ལམ་ཆེད་ཁྲག་དམར་ཆི་ལིར་ཕྱིན་སོང༌། བསམ་བློ་ཞིག་ཐོངས་དང༌། སྤུན་ཟླ་ཚོ། འདས་པོ་དང་འདས་མོ་ཚོས་ང་ཚོའི་མདུན་ལམ་འདི་ཚེ་སྲོག་གི་བསྐྲུན། དེ་ལྟར་སྤུན་ཟླ་དེ་དག་གི་རོ་སྟེང་དུ་བསྡད་ནས་ལུས་དགའ་བའི་རྣམ་པ་བྲོ་འཁྲབ། ངག་སྐྱིད་པའི་རྣམ་པ་གླུ་བླངས། ཡིད་ཚིམས་པའི་རྣམ་པ་སྤྲོ་བ་བལྟས། དེ་ལྟ་བུའི་དགྱེས་སྟོན་ཞིག་བྱས་ན་སེམས་ཀྱིས་བཟོད་དམ། ང་ཚོའི་དཔའ་བོ་དང་དཔའ་མོ་ཚོའི་ཕ་མ་བུ་ཚ་སོགས་ལ་གདོང་ཇི་ལྟར་སྟོན།

རེབ་གོང་དགེ་འདུན་རྒྱ་མཚོ། དགའ་ལྡན།

བོད་མདོ་དབུས་ཁམས་གསུམ་རྒྱ་ནག་གི་སྲིད་ངན་གྱིས་བཅིངས་པ་ནས་བཟུང༌། བོད་མི་ལ་བརྡབ་གསིག་དང་བོད་མིའི་ཤེས་འཇོན་གཉིས་ལྡན་གྱི་གསར་སྐྱེས་ཡོན་ཏན་པ་དང༌། དཔའ་བོ་དཔའ་མོ་རྣམས་ཀྱི་རང་སྲོག་ཤོར་བ་ཐེངས་གཅིག་མིན་ཏེ། ༡༩༥༩ ལོར་བོད་མིའི་ཞི་བའི་ངོ་རྒོལ་སྐབས། བོད་མི་སྟོང་ཕྲག་མང་པོའི་རང་སྲོག་རྒྱ་ལག་ལ་ཤོར་ཡོད། རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་དུ་ད་ལྟ་ང་ཚོས་དུས་དྲན་ཙམ་བྱེད་པ་མ་གཏོགས། དཔའ་བོ་དཔའ་མོ་རྣམས་གང་གི་ཆེད་དུ་ཚེ་སྲོག་བཏང་བའི་དགོས་པ་ཡང་ད་དུང་ང་ཚོས་ངེས་ཤེས་རྙེད་ཐུབ་མེད། རྒྱུ་རྐྱེན་ནི་ང་ཚོས་ཁ་ཕྱོགས་ཀྱི་ནུས་སྟོབས་གཅིག་ཏུ་མ་བསྒྲིལ་བར་སྔོན་ཆད་ལྟར་ཚོགས་པ་འདྲ་མིན་གྱིས་ལྟ་བའི་འཐེན་ཕྱོགས་དང༌། ལུང་ཚན་གྱི་ཞེན་ཁོག་ཁོ་ནས་གཅིག་སྒྲིལ་མི་བྱེད་པར་ཟུར་བལྟ་ཟུར་ཉན་བྱས་ནས་བསྡད་པའི་གོམས་གཤིས་དེ་སྲོལ་རྒྱུན་རང་འཇགས་སུ་གནས་པ་དེའི་དབང་གིས་བྱུང་བ་ལ་ངོས་འཛིན་བྱེད་ཆོག དེང་གི་སྐབས་འདིར་སྲོལ་རྒྱུན་རྒྱང་རིང་དུ་དོར་དགོས་པ་ནི། བོད་མིའི་རྩ་དོན་སྒྲུབ་པ་ལ་གནད་དམ་པའོ།