རྒྱལ་སྤྱི།

རྒྱ་ནག་གིས་ཧྥ་རན་སི་དང་ཉིང་ཧོང་། མེག་ཛི་ཁོ་བཅས་ལ་རྒྱུ་མཚན་མི་འདྲ་བའི་གསུམ་གྱིས་ཞེ་འཁོན་བྱེད་ཀྱི་ཡོད་པ་རེད། ཕྱི་ཟླ་དྲུག་པའི་ནང་ཧྥ་རན་སིའི་གྲོང་ཁྱེར་པ་རི་སིའི་ནང་༸སྐྱབས་མགོན་རིན་པོ་མཆོག་ལ་ཆེ་མཐོང་མི་སེར་ཕྱག་ཁྱེར་འབུལ་གྱི་ཡིན་པ་དང། དེ་ནི་ཧྥ་རན་སིའི་སྲིད་འཛིན་སར་ཀོ་ཛི་དང་རྒྱ་ནག་གི་སྲིད་འཛིན་ཧུའུ་ཅིན་ཐོ་གཉིས་མཇལ་འཕྲད་བྱུང་ནས་བདུན་ཕྲག་ལྔ་མ་ཟིན་ཙམ་གྱི་རྗེས་སུ་ཡིན་པ་རེད། ཁོང་གཉིས་ཐུག་འཕྲད་སྐབས་བོད་དོན་གྱི་ལས་འགུལ་ལ་སེམས་ཤུགས་སྤར་བའི་ལས་ཀ་གང་ཡང་མི་བྱེད་པའི་དམ་བཅའ་བཞག་ཡོད་པར་བརྟེན། ད་ལྟ་ཧྥ་རིན་སིས་༸གོང་ས་མཆོག་ལ་མི་སེར་ཕྱག་ཁྱེར་འབུལ་བཞེས་གནང་རྒྱུ་ཡིན་པ་དེར་རྒྱ་ནག་ཧ་ཅང་གི་ཁོང་ཁྲོ་ལངས་དགོས་པའི་གནས་སུ་གྱུར་ཡོད་པ་རེད།

ཟླ་འདིའི་ཚེས་༤ ཉིན་གསར་ལམ་ཁག་ནས་གནས་ཚུལ་སྤེལ་གསལ་ལྟར་ན། བལ་ཡུལ་སྲིད་བློན་པུ་རཱ་ཅང་དཱ་མཆོག་གིས། བལ་ཡུལ་གྱི་དམག་སྤྱི་ཆེན་མོ་ཀ་ཏི་ཝལ་གྱིས་དབུས་གཞུང་གི་བཀོད་མངགས་ལ་བརྩི་སྲུང་མ་བྱས་པ་རྒྱུ་མཚན་དུ་བྱས་ནས། དམག་སྤྱི་ཆེན་མོའི་ལས་གནས་ནས་ཕྱིར་འཕུད་གཏོང་དགོས་པའི་བཀའ་རྒྱ་བཏང་ཡོད་པ་རེད།

ཟླ་འདིའི་ཚེས་༢ ཉིན་གསར་ལམ་ཁག་ནས་གནས་ཚུལ་སྤེལ་གསལ་ལྟར་ན། འཛམ་གླིང་རྒྱལ་ཁབ་༡༦ ཙམ་ལ་ཁྱབ་བརྡལ་ཕྱིན་ཟིན་པའི་ཕག་འཆམ་ནད་ཡམས་འདིས་དེང་སྐབས་མི་མང་པོ་ཞིག་གི་ཚེ་སྲོག་ལ་ཉེན་ཁ་ཧ་ཅང་ཆེན་པོ་ཡོད་པ་དང༌། འདི་ཉིད་འགོག་ཐབས་སུ་མཉམ་འབྲེལ་རྒྱལ་ཚོགས་ཀྱི་འཕྲོད་བསྟེན་ལྷན་ཚོགས་ནས་རིན་མེད་ཐོག་ནས་སྨན་བཅོས་དང་ཁ་རས་སོགས་འགྲེམས་སྤེལ་བྱེད་བཞིན་ཡོད་པ་རེད།     ཕག་འཆམ་ནད་ཡམས་འདིའི་འབྱུང་ཁུངས་དང་ནད་རྟགས་འགོག་ཐབས་སོགས། རྒྱལ་ཚོགས་ཀྱི་འཕྲོད་བསྟེན་ལྷན་ཚོགས་ཀྱི་འཐུས་མི་དང་ཚན་རིག་པ་སྨན་པ་བཅས་ཀྱིས་གནད་དོན་འགའ་ཁྱབ་བསྒྲགས་བྱས་ཡོད་པ་རེད།

ཟླ་བ་༤ པའི་ཚེས་༢༩ ཉིན་གསར་ལམ་ཁག་ནས་གནས་ཚུལ་སྤེལ་གསལ་ལྟར་ན། འཛམ་གླིང་རྒྱལ་ཚོགས་འཕྲོད་བསྟེན་ལྷན་ཚོགས་ཀྱིས། ཐེ་ཝན་རྒྱལ་སྤྱིའི་འཕྲོད་བསྟེན་ལྷན་ཚོགས་ཀྱི་ལོ་འཁོར་ལྷན་ཚོགས་སུ་འཛུལ་ཞུགས་དགོས་པའི་མགྲོན་ཤོག་སླེབས་པ་བཞིན། ཐེ་ཝན་འཕྲོད་བསྟེན་ལྷན་ཚོགས་ཀྱི་ངོས་ནས་ཞུགས་འཆར་ཡོད་ཀྱང༌། རྒྱ་ནག་གཞུང་གིས་སྔོན་ལྟར་བཀག་འགོག་བྱེད་སྲིད་པ་དང༌། ཐེ་ཝན་གཞུང་གསར་པའི་ངོས་ནས་ཀྱང་བཀག་འགོག་བྱེད་སྲིད་པའི་གནས་ཚུལ་ཐོན་ཡོད་པ་རེད།

ཟླ་འདིའི་ཚེས་༢༥ ཉིན། བརྒྱུད་ལམ་ཁག་ནས་གནས་ཚུལ་ཐོན་གསལ་ལྟར་ན། རྒྱ་སྒོར་སྟོང་ཕྲག་གསུམ་བཞི་ཙམ་གྱི་འགྲོ་གྲོན་བཏང་ནས་མངལ་དུ་ཟླ་བ་དྲུག་བདུན་ཙམ་ཕྱིན་པའི་ཕྲུ་གུའི་ཤ་ལ་རོལ་རྒྱུ་དེ། ཐའེ་ཝན་ཚོང་པ་ཚོས་བྲོ་བ་ལྡན་པའི་ཟས་རིགས་ཁྱད་དུ་འཕགས་པ་ཞིག་ཏུ་ངོས་འཛིན་བྱེད་ཀྱི་ཡོད་སྐོར་གྱི་གནས་ཚུལ་ཐོན་འདུག

ད་ཐེངས་ྋགོང་ས་མཆོག་ཨ་རིར་ཆིབས་བསྒྱུར་གནང་བ་དང་སྟབས་བསྟུན་ནས་ཟླ་འདིའི་ཚེས་༢༦ ཉིན་ྋགོང་ས་མཆོག་སན་ཏ་བྷ་ར་ནས་ཨ་རིའི་གྲོང་ཁྱེར་སན་ཧྥི་རན་སི་སི་ཁོའི་ཤར་ཕྱོགས་སུ་ཡོད་པའི་བྷར་ཁ་ལེ་རུ་ཆིབས་སྒྱུར་གྱིས་དེར་ཡོད་བོད་རིགས་དང་སོག་རིགས། ཧི་མ་ལ་ཡའི་ནང་པ་སོགས་ལ་མཇལ་འཕྲད་གནང་ཡོད་པ་རེད།

ཟླ་འདིའི་ཚེས་༢༧ ཉིན་ཨེ་པི་གསར་ཁང་དུ་གནས་ཚུལ་སྤེལ་གསལ་ལྟར་ན། རྒྱལ་སྤྱིའི་དབུལ་ཕོངས་རོགས་ཕན་ཚོགས་པ་ཞེས་པ་ཞིག་གིས་༸གོང་ས་མཆོག་ཉིན་གུང་གསོལ་ཚིགས་སུ་གདན་འདྲེན་ཞུས་པ་དང། སྐབས་དེར་༸གོང་ས་མཆོག་གིས་སྐུ་མགྲོན་འབྱོར་ལྡན་རྣམས་ཀྱི་ལྷན་དུ་སྡོད་རྒྱུ་བྱུང་བ་ནི་ཅི་འདྲའི་དགའ་སྤྲོའི་རང་བཞིན་ཞིག་རེད་ཅེས་དགོད་བྲོ་སློང་བ་དང། དེ་དང་མཉམ་དུ་ཁོང་གིས་ང་ཡང་ཁྱིམ་མེད་པའི་མི་ཞིག་ཡིན་ཅེས་གསུངས་པ་སོགས་མི་ཀུན་དགོད་བྲོའི་གནས་སུ་འདྲེན་པར་མཛད་ཅིང། ལྷག་པར་ཏུ་ཁོང་གིས་ཞི་བདེ་དང་དབུལ་ཕོངས་སོགས་ལ་ཐུགས་སྣང་དགོས་པའི་སྐུལ་མ་ཡང་གནང་ཡོད་པ་རེད།

ཟླ་འདིའི་ཚེས་༢༧ གསར་ལམ་ཁག་ནས་གནས་ཚུལ་སྤེལ་གསལ་ལྟར་ན། དབྱིན་ཡུལ་དུ་རང་ལོ་༡༢ ལ་སོན་པའི་བུ་མོ་ཞིག་ལ་ཕྲུག་གུ་བུ་གཅིག་སྐྱེས་ཡོད་པ་དེ། འཛམ་གླིང་ནང་ཨ་མ་ལོ་ན་ཆུང་ཤོས་ཀྱི་གྲས་ཆགས་ཡོད་པའི་གནས་ཚུལ་ཐོན་ཡོད་པ་རེད། བུ་མོ་རང་ལོ་༡༢ ལས་སོན་མེད་པས་མངལ་དུ་ཕྲུག་གུ་སྦྲུམ་ཡོད་མེད་ཤེས་མེད་པ་དང༌། བུ་མོས་རང་ཉིད་དང་ཐེངས་གཅིག་འབྲེལ་བ་བྱུང་བའི་བུ་དེའང་ཕྲུ་གུའི་ཨ་ཕ་ཡིན་མིན་གྱི་གནས་ཚུལ་གསལ་པོ་བཤད་ཐུབ་མེད་པ་རེད། བུ་མོའི་ནང་མིས་ཕྲུ་གུ་ཨ་ཕ་སུ་ཡིན་མིན་བརྩད་གཅོད་ཐུབ་ཡོད་ན་ཡང༌། དབྱིན་ཡུལ་གྱི་སྤྱི་ཚོགས་ཞབས་ཞུ་ཚོགས་པས་རོགས་པ་མ་བྱས་ན་ལོ་ན་ཆུང་བའི་ཕྲུ་གུ་གཉིས་ཀྱི་འཚོ་བ་འཁྱོལ་ཁག་པོ་རེད་ཅེས་གསར་འགོད་པར་བརྗོད་ཡོད་པ་རེད།

ཟླ་འདིའི་ཚེས་༢༦ ཉིན་གསར་ལམ་ཁག་ནས་གནས་ཚུལ་སྤེལ་གསལ་ལྟར་ན། རྒྱ་གར་གྱི་སྲིད་བློན་མན་མོ་ཧན་སིང་མཆོག་གིས་གྷུ་ཇི་ར་ཏིའི་མངའ་སྡེར་འོས་འཕེན་གྱི་ལས་འགུལ་སྤེལ་བའི་གསུང་བཤད་གནང་བཞིན་པའི་སྐབས། རང་ལོ་༢༡ ལ་སོན་པའི་སློབ་མ་ཞིག་གིས་སྲིད་བློན་ལ་ངོ་རྒོལ་གྱི་ལྷམ་གཡུགས་པའི་གནས་ཚུལ་ཐོན་ཡོད་པ་རེད། དེ་ཡང་སྲིད་བློན་མཆོག་གིས་མི་མང་སྟོང་ཕྲག་མང་པོ་འཛོམས་པའི་ཏག་གོར་ཚོགས་ཁང་དུ་གསུང་བཤད་འགོ་བཙུགས་ནས་ཡུན་རིང་མ་སོང་བར། མདུན་གྲལ་དུ་ཡོད་པའི་ཧ་ཊི་ཆིས་ཟེར་བ་རང་ལོ་༢༡ ལ་སོན་ཞིང༌། ས་གནས་དེར་གློག་ཀླད་ཆེད་ལས་མཐོ་སློབ་ཀྱི་སློབ་མ་ཡིན་པ་ཞིག་གིས་ལྷམ་གཡུགས་ནས་སྲིད་བློན་གྱི་ཉེ་འགྲམ་དུ་ལྷུང་ཡོད་པ་རེད།

གསར་ལམ་ཁག་ནས་གནས་ཚུལ་ཐོན་པ་ལྟར་ན། ྋགོང་ས་སྐྱབས་མགོན་ཆེན་པོ་མཆོག་གིས་ངོས་འཛིན་མཛད་པའི་པཎ་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་རྒྱ་གཞུང་གིས་འཛིན་བཟུང་བཙན་འཁྲིད་བྱས་ནས་མི་ལོ་བཅུ་བཞི་ཙམ་འཁོར་བའི་ཉིན་མོ་དང་བསྟུན། ལྷོ་ཨ་ཧྥི་རི་ཁར་ཡོད་པའི་བོད་དོན་རྒྱབ་སྐྱོར་ཚོགས་པ་ཞིག་གིས་ཞི་བའི་གོམ་བགྲོད་ཅིག་བྱེད་རྒྱུའི་གསལ་བསྒྲགས་བྱས་ཡོད་པ་རེད།  ཕྱི་ཟླ་༥ ཚེས་༡༧ ཉིན་ནས་བཟུང་ལྷོ་ཨ་ཧྥི་རི་ཁར་ཡོད་པའི་བོད་དོན་རྒྱབ་སྐྱོར་ཚོགས་པ་ཞིག་གི་གོ་སྒྲིག་འོག་པཎ་ཆེན་རིན་པོ་ཆེ་དང་ཁོང་གི་སྐུ་འཁོར། དེ་བཞིན་ཆབ་སྲིད་བཙོན་པ་རྣམས་གློད་གྲོལ་དང༌། བོད་ནང་དུ་རང་དབང་གི་སྒྲིག་འཛུགས་དང་གསར་འགོད་པ་འགྲོ་བསྐྱོད་བྱེད་དུ་འཇུག་དགོས་པ་སོགས་ཀྱི་དགོས་འདུན་དོན་ཚན་ལྔ་ཅན་ཞིག་འདོན་རྒྱུ་དང༌། ཞི་བདེ་དང་བྱམས་བརྩེའི་གོམ་བགྲོད་ཅིག་བྱེད་རྒྱུའི་གསལ་བསྒྲགས་ཤིག་སྤེལ་ཡོད་འདུག